रेडियो रोशी,
काभ्रेका चार पालिका रोशी, महाभारत, खानीखोला र बेथानचोक गाउँपालिकाले भौतिक र पर्यटन विकासका लागी संयुक्त प्रयास गर्ने भएका छन। सिमाना जोडिएको यी चार पालिकाको सीमा क्षेत्रमा पर्यटकीय स्थलहरू रहेकाले त्यसको विकासका लागि चारै पालिकाले संयुक्त पहलकदमी गर्ने भएका हुन् ।
बुधबार रोशी गाउँपालिकाको सभाहलमा रोशी गाउँपालिकाका अध्यक्ष दिनेश लामाको अध्यक्षतामा अन्तरपालिका बैठक बसी सो निर्णय गरेका हुन्। बैठकले पर्यटन पूर्वाधार, भौतिक पूर्वाधार, विपत् व्यवस्थापन, शिक्षा, स्वास्थ्य, साझा प्राकृतिक स्रोतको उपयोग र व्यवस्थापनको विषयमा चार पालिकाबीच साझेदारी रूपमा के गर्न सकिन्छ भन्नेबारेमा छलफल भएको थियो ।
मानव स्वास्थ्य तथा पशुजन्य विपत् तथा अन्य प्रकारका प्रकोपहरूको पहिचान गरी सोको न्यूनीकरण तथा व्यवस्थापनका लागि चारवटै पालिकाले एकीकृत कार्ययोजना बनाई अगाडि बढ्ने, चारवटै पालिकाको भौगोलिक साँध–सिमानाका सम्बन्धमा उत्पन्न असमझदारीहरुको पहिचान गरी सहअस्तित्वको भावनाअनुरूप एक–आपसमा समन्वय, सहकार्य र समझदारीपूर्वक समाधानका लागि पहल गर्नेजस्ता निर्णय भएको लामाले बताउनुभयो ।
रोशी गाउँपालिकाका अध्यक्ष दिनेश लामाको अध्यक्षतामा भएको अन्तरपालिका समन्वय बैठकमा बेथानचोक गाउँपालिकाका अध्यक्ष भगवान अधिकारी, खानीखोला गाउँपालिकाका अध्यक्ष इन्द्रबहादुर थिङ, महाभारत गाउँपालिकाका अध्यक्ष कान्छालाल जिम्बा, रोशी गाउँपाकिाका उपाध्यक्ष मिमबहादुर वाइबा ज्वाला, खानीखोला गाउँपालिकाका उपाध्यक्ष दोर्जेमान जिम्बा, महाभारत गाउँपालिकाका उपाध्यक्ष सागर मोक्तान, रोशी गाउँपालिकाका प्रमुख प्रशासकीय अधिकृत रामबहादुर तामाङ, प्रवक्ता वसन्तकुमार तामाङ, बेथानचोक गाउँपालिकाका प्रवक्ता मधुसुदन तिमल्सिना, बेथानचोक– २ का वडाध्यक्ष पुरुषोत्तम तिमल्सिना, रोशी गाउँपालिकाका योजना शाखा प्रमुख राम लामालगायतको उपस्थिति रहेको थियो ।
