काभ्रे,
नमोबुद्ध नगरपालिकाको सार्वजनिक सुनुवाइ सम्पन्न भएको छ । आज नगरपालिकाको प्राङ्गणमा नगरपालिकाले आर्थिक बर्ष २०७९÷८० मा सम्पन्न गरेका कार्यक्रम र योजनाको प्रगति, आर्थिक बर्ष २०८०÷८१ का लागि स्वीकृत बार्षिक नगर विकास योजना (नीति, कार्यक्रम, बजेट) लगायतका नगरपालिकाबाट हुने सेवा प्रवाहका सम्बन्धमा सार्वजनिक सुनुवाई गरीएको हो ।
कार्यक्रमको सुरुवातमा नगरका योजना अधिकृत विष्णुकुमार अधिकारीले आर्थिक बर्ष २०७९÷८० चालु आर्थिक बर्षको प्रथम त्रैमासिक अवधीको को प्रगति प्रतिवेदनका साथै कार्यक्रमका बारेमा जानकारी गराउनुभएको थियो ।
कार्यक्रमका सहभागीहरुले उपभोक्ता समितिको क्षेत्राधिकार, शिक्षा क्षेत्रमा भएको अनियमितता, कर्मचारी व्यवस्थापन, विकास योजनामा सूचना पाटी नभएको, निशुल्क औषधीको दुरुपयोग, करको दर र दायरा, लगायतका बिषयमा गुनासो, सुझाव र जिज्ञासा राखेका थिए । सहभागीहरुले गरेका गुनासो, जिज्ञासा नगर प्रमुख कुनसाङ लामा, उपप्रमुख रत्नबहादुर लामा, प्रमुख प्रशासकीय अधिकृत इश्वरीप्रसाद शर्माले सम्बोधन गर्नुभएको थियो ।
नगरप्रमुख कुनसाङ लामाले विकासको लागि प्रदेश र संघ सरकारसंग समन्वय गरिरहेको भन्दै सिमित श्रोतका कारण विकासका असिमित चाहना पुरा गर्न नसकिएको बताउनुभयो ।
कार्यक्रममा नगरका कर्मचारीहरु, बिभिन्न राजनीतिक दल, सामाजिक संघ संस्था, सरोकारवाला र सेवाग्राहीको सहभागीता रहेको थियो ।
