काभ्रे,
आज हुने दुईवटा प्रदर्शनलाई व्यवस्थित बनाउन काठमाडौंमा उच्च सुरक्षा सतर्कता अपनाईएको छ । राष्ट्रिय युवा सङ्घ नेपाल र राष्ट्र, राष्ट्रियता, धर्म, संस्कृति र नागरिक बचाउ अभियानका नामबाट व्यवसायी दुर्गा प्रसाईँको आह्वानमा हुन लागेको प्रदर्शनलाई ध्यान दिँदै काठमाण्डौ उपत्यकाको सुरक्षा व्यवस्था कडा बनाइएको हो । प्रदर्शनका क्रममा शान्ति सुरक्षा कायम गर्न उपत्यका प्रहरी कार्यालयले एकीकृत सुरक्षा योजना लागु गरेको छ । प्रदर्शनको सुरक्षा व्यवस्थापनका लागि करिब ७ हजार सुरक्षाकर्मी परिचालन गरिने र यसका लागि प्रहरी नायव महानिरीक्षक लालमणि आचार्यको नेतृत्वमा ‘कमाण्ड’ सेन्टर बनाइएको उपत्यका प्रहरी कार्यालयका सूचना अधिकारी प्रहरी वरिष्ठ उपरीक्षक दिनेश मैनालीले जानकारी दिनुभयो ।
प्रदर्शन स्थल र जुलुस आउने बाटोमा १ हजार ५ सय ८८ सशस्त्र प्रहरी परिचालित गरिने छ । यसबाहेक काठमाडौँमा २ हजार ६ सय ३७ जना, ललितपुरमा ५ सय ६४ जना र भक्तपुरमा ४ सय ४ जना थप प्रहरी परिचालन गरिने छ । यस्तै ट्राफिक व्यवस्थापनका लागि उपत्यकामा ९ सय ७८ जना ट्राफिक प्रहरी खटिनेछन् । अपराध अनुसन्धान विभागबाट सूचना सङ्कलनका लागि ३ सय ५१ जना सुरक्षाकर्मी परिचालन गरिने प्रहरी प्रधान कार्यालयले जनाएको छ । प्रहरीले ड्रोनबाट पनि प्रदर्शन स्थलको सुरक्षा निगरानी गर्ने जनाएको छ ।
