काभ्रे,
हानिकारक सामग्री पोष्ट हुने क्रम बढेकाले सामाजिक सञ्जालको प्रयोग गर्दा सचेत हुन प्रहरीले आग्रह गरेको छ । सामाजिक सञ्जाल ह्याक गरेर चरित्र हत्या गर्ने खालका अश्लील सामग्रीहरू पोष्ट हुन थालेको गुनासो बढेको भन्दै प्रहरीले सामाजिक सञ्जालको प्रयोग गर्दा सचेत रहन सबैलाई आग्रह गरेको हो । प्रहरीकाअनुसार फेसबुुक, इन्स्टाग्राम, ट्वीटरका साथै इमेल ह्याक गरेर चरित्र हत्या गर्नेदेखि रकमसमेत माग्ने क्रम बढेको छ ।
आफ्नो खाता बलियो बनाए पनि आफ्नो सञ्जाल ह्याक भए साइबर अपराधसम्बन्धी उजुरी प्रहरीमा पनि दिन सकिने नेपाल प्रहरीका प्रवक्ता डीआईजी कुवेर कडायतले बताउनुभयो । सूचना प्रविधिविज्ञले यस्तो जोखिमबाट बच्न प्रयोगकर्ता नै सचेत हुनुपर्ने बताएका छन् । सामाजिक सञ्जालको पासवर्ड सुरक्षित र बलियो राख्ने, शङ्कास्पद लिङ्क नखोल्ने, जानकारी नभएका र प्रलोभन देखाइएको फारम नभर्ने, व्यक्तिगत विवरण सार्वजनिक नगर्ने र आफ्नो खाता अरुले खोल्ने प्रयास गरे मोबाइलमा सन्देश आउने तरिका अपनाए सामाजिक सञ्जालबाट हुने हिंसा र ठगीबाट जोगिन सकिने सूचना प्रविधि विज्ञ अनिल घिमिरेले जानकारी दिनुभयो ।
