काभ्रे,
एमालेको संकल्प यात्रालाई लक्षित गरेर धुलिखेल–खावा सडकमा रातारात काम भएको भन्दै राष्ट्रिय स्वतन्त्र पार्टी काभ्रेपलाञ्चोकले असन्तुष्टि जनाएको छ । रास्वपाका काभ्रेपलान्चोक जिल्ला संयोजक प्रबिन कुमार ढकालले सामाजिक सञ्जाल मार्फत खुल्ला ध्यानाकर्षण गर्दै २४ गतेपछि रातारात काम हुन्छ कि हुँदैन ? भनेर प्रश्न गर्नुभएको छ । विगत साढे १ वर्षदेखि धुलिखेल–खावा सडक विस्तारको काम भैरहेको छ । तर निर्माण कम्पनीको चरम लापर्बाहीका कारण तोकिएको समयमा काम सम्पन्न नहुने निश्चित छ । अहिले सडक विस्तारको काम लगभग अलपत्र जस्तै छ ।
एमालेको संकल्प यात्रामा पूर्व प्रधानमन्त्री समेत रहनुभएका अध्यक्ष केपी ओली काभ्रे आउने भएपछि रातारात सडकको खाल्डो पुरिएको भन्दै रास्वपाले आपत्ति जनाएको हो । ‘दैनिक सयौँ सवारी साधन र हजारौँ यात्रु ओहोरदोहोर गर्ने अरनिको राजमार्गको काम सम्पन्न गर्न बेवास्ता गर्ने तर कुनै नेता आउने भनेपछि मात्रै खाल्डो पुर्न थाल्नु राम्रो पक्ष होइन । केपी बाको यात्रालाई मात्रै सहज गराउन खोज्नु दुर्भाग्यपूर्ण हो ।’
ढकालको ध्यानाकर्षणमा भनिएको ‘बाहरु चै नागरिक अनि दैनिक जोखिमपूर्ण यात्रा गर्ने बृद्ध बा आमा, सुत्केरी, बालबालिका सम्पूर्ण यात्रु चै मानिस होइनन ? नागरिकहरु होइनन् ? यो नागरिक प्रतिको गम्भीर विभेद हो, यो गतिविधि काभ्रेपलान्चोक जिल्लाका प्रशासन प्रमुख र जिल्ला समन्वय समिति र सरोकार निकायलाई लज्जित बनाएको छ । केपी बालाई जिल्लामा हार्दिक स्वागत छ । बाटोको सुधार स्वागतयोग्य छ ।
तर सयौं यात्रु दैनिक लडदैपडदै जोखिमपूर्ण यात्रा गरिरहँदा चै,यही सामान्य सुधार पनि किन पहिला हुन सकेन भन्ने जिम्मेवार पक्षलाई आमनागरिकको गम्भीर प्रश्न छ ? अब निर्माण सम्पन्न गरिने काम २४ गते पछी राता रात वा कसरी अगाडि बढ्छ आमनागरिकको गम्भीर ध्यानाकर्षण रहेको छ ।’
