काभ्रे,
रोशी गाउँपालिकाका किसानहरुलाई निःशुल्क फलफूलको बिरुवा र तरकारीको बिउ वितरण गरिएको छ । बागमती प्रदेशको आर्थिक सहयोग एवम् रोशी गाउँपालिका कृषि शाखाको आयोजनामा किसानहरुलाई फलफूलको बिरुवा र तरकारीको बिउ वितरण गरिएको हो । बिरुवा र बीउ वितरण सम्बन्धि आवेदन दिन आब्हान गर्दा आवेदन दिने सबै किसानहरुलाई बिरुवा र बीउ वितरण गरिएको गाउँपालिका कृषी शाखा प्रमुख समिता तामाङले बताउनुभयो ।
फलफूलहरुमा सुन्तला, कागती, जुनार, एभोकाडो, दाते ओखर लगायतको बिरुवाहरु ८ सय भन्दा बढी वितरण गरेको उँहाले जानकारी दिनुभयो । त्यसैगरी १,१२० प्याकेट भन्दा धेरै प्याकेट तरकारीको बीउ वितरण गरिएको छ । किसानहरुलाई विभिन्न रोगको बिषादीसहित स्प्रेयर २० वटा र प्लास्टिक टनेल ५० थान पनि प्रदान गरिएको उँहाले बताउनुभयो । समग्रमा किसानलाई १० लाख बराबरको फलफूलको बिरुवा र तरकारीको बिउ वितरण गरिएको छ ।
बिरुवा र बीउ वितरण गर्दै गाउँपालिकाका अध्यक्ष दिनेश लामाले ‘रोशीको दृष्टि, पर्यटन र कृषि’ भन्ने नारालाइ सार्थकता दिन कृषिजन्य बिरुवा र बिउसहित सामग्री वितरण गरेको बताउनुभयो । रोशीको आत्मनिर्भरको पहिले आधार भएकाले कृषिलाई प्राथमिकता दिएर कार्यक्रम गर्दै आएको उँहाको भनाइ छ ।
