काभ्रे,
काभ्रे जिल्लाको रोशी गाउँपालिकालाई ‘अनिवार्य तथा निःशुल्क शिक्षा लागू’ भएको गाउँपालिका घोषणा गरिएको छ । गाउँ शिक्षा समितिको हिजो बसेको बैठकको निर्णय अनुसार आजबाट लागू हुने गरी गाउँपालिकालाई अनिवार्य तथा निःशुल्क शिक्षा लागू भएको स्थानीय तह घोषणा गरिएको हो ।
पालिकाभित्र ६ हजार ७ सय ५२ घरधुरी रहेका छन् । यसमध्ये ४ देखी १३ बर्षसम्मका ५ हजार ७०४ जना बालबालिकाहरु रहेका छन् । पालिकाका यी सम्पुर्ण बालबालिका आधारभूत शिक्षा अनिवार्य र माध्यमिक तह निःशुल्क भएको सुनिस्चित भएपछि गाउँपालिकालाई ‘अनिवार्य तथा निःशुल्क शिक्षा लागू’ भएको गाउँपालिका घोषणा गरिएको हो ।
गाउँपालिका अध्यक्ष दिनेश लामाले सो उमेर समुहका सबै बालबालिका विद्यालय भर्ना भएको पाइएपछी अनिवार्य तथा निःशुल्क शिक्षा लागू भएको स्थानिय तह घोषणा गर्न प्रस्ताव गर्नुभएको थियो । आज शिक्षा विकास निर्देशनालय हेटौंडाका महानिर्देशक दिपेन्द्र सुवेदीले पालिकाले सार्वजनिक गरेको घोषणा पत्र पढेर पालिकालाई अनिवार्य तथा निःशुल्क शिक्षा लागू भएको पालिका घोषणा गर्नुभएको हो ।
कार्यक्रमलाई सम्बोधन गर्दै महानिर्देशक सुवेदीले संविधानले सुनिश्चित गरेको शिक्षा सम्बन्धी अधिकारलाई पालिकाले शतप्रतिशत कार्यान्वयन गर्दै अनिवार्य तथा निःशुल्क शिक्षा लागू स्थानीय तह घोषणा गरिएको बताउनुभयो । पालिकाभित्र रहेका बालबालिकालाई विद्यालयमा भर्ना गराई शिक्षाको पहुँचमा पु¥याएर पालिकाले पहिलो दायित्व पूरा गरेको उहाले भन्नुभयो । यसलाई निरन्तरता दिदैं विद्यार्थीहरुलाई गुणस्तरीय शिक्षा प्रदान गर्नको लागि उनले आग्रह गर्नुभयो ।
त्यसैगरी गाउँपालिका अध्यक्ष दिनेश लामाले संविधानमा भएको व्यवस्था लागु गर्न नेपाल सरकारले सुरु गरेको अभियानमा स्थानिय तहले साथ दिएको बताउनुभयो । उँहाले कार्यान्वयन सहज बनाउन विद्यालय एकीकरणका साथै शिक्षक दरवन्दी थप्दै जाने बताउनुभयो । विद्यालयहरुलाई कुनै पनि शिर्षकमा पैसा नलिन अनुरोध गर्दै गाउँपालिकाले अप्ठ्यारोमा सहयोग गर्ने बताउनुभएको छ । गाउँपालिकाका उपाध्यक्ष मिमबहादुर वाइवाले शिक्षा क्षेत्रलाई प्राथमिकता दिएर सिमित स्रोतका बावजुद पनि अनिवार्य तथा निःशुल्क शिक्षा लागू गरिएको बताउनुभयो ।
