काभ्रे,रेडियो रोशी,
रोशी गाउँपालिकाको सिखरपुरमा आत्महत्या रोकथामको लागि मानसिक स्वास्थ्य सम्बन्धि दुई दिवसीय कार्यशाला सम्पन्न भएको छ । वडा नं १२ को आयोजना तथा साम्दो भविष्यको आर्थिक एवम् प्राबिधिक सहयोगमा सञ्चालन भएको दुई दिवसीय कार्यशालाको आज रोशी गाउँपालिका अध्यक्ष दिनेश लामाको प्रमुख आतिथ्यतामा समापन गरीएको हो ।
कार्यक्रमलाई सम्बोधन गर्नुहुदै गाउँपालिका अध्यक्ष दिनेस लामाले नेपालमा अप्राकृतिक मृत्युका कारणहरूमध्ये आत्महत्याको तथ्यांक बढि मात्रामा रहेकोप्रति चिन्ता ब्यक्त गर्नुभएको छ । अझ विशेष गरी युवा अवस्थाका मानिसहरुमा आत्महत्या बढ्दै गएको बताउँनुहुदै उहाँले आत्महत्याको मूल कारणमा मानसिक रोग र तनाव रहेको बताउँनुभयो । उहाँले आत्महत्या रोकथामका लागि परिवारमा कोही सदस्यले एकोहोरिने, असामान्य रुपले चिन्ता लिने जस्ता व्यवहार देखाएमा अभिभावकले तत्काल मनोपरामर्श तथा उपचारमा ध्यान दिनुपर्ने बताउनुभयो ।
सर्बप्रथम आत्महत्याको कारण शुक्ष्म ढङ्गबाट बुझ्ने, छोराछोरीहरुको साथमा समय बिताउने, उनीहरुलाई हौशला प्रदान गर्नुपर्ने उहाँको भनाई छ । आत्महत्या रोकथामका लागि अति उपयोगी हुने मानसिक स्वास्थ्य सम्बन्धि कार्यशाला अबका दिनहरुका बाकि रहेका ११ वटै वडाहरुमा सञ्चालन गरीने अध्यक्ष लामाले बताउनुभयो ।
रोशी गाउँपालिकाभित्र बढ्दो रुपमा रहेको आत्महत्या रोकथाम तथा न्युनिकरणको लागि मानसिक स्वास्थ्य सम्बन्धि दुई दिवसीय कार्यशाला आयोजना गरीएको १२ नं वडाका वडा अध्यक्ष बसन्त कुमार तामाङले जानकारी दिनुभयो ।
कार्यशालामा मङ्गलटार प्रहरी चौकी प्रमुख कृष्ण गिरिले आत्महत्या रोकथाम सम्बन्धि कक्षा सञ्चालन गर्नुभएको थियो । कार्यशालामा वडा भित्र रहेका ५ वटै सामुदायीक बिद्यालयका शिक्षकहरु, टोलटोलका प्रतिनिधिहरु , बिन्ध्यबासीनी आधारभुत र गणेश माध्यामिक बिद्यालयका बिद्यार्थीहरु, स्वास्थ्य शाखा प्रमुख गङ्गा लाल श्रेष्ठ, अभिभावक लगायतको सहभागिता रहेको थियो ।
