काभ्रे,
काभ्रेपलाञ्चोक जिल्लाका अमरध्वज लामा रेडियो नेपालको कार्यकारी निर्देशकमा अमरध्वज लामा नियुक्त हुनुभएको छ । बिहीबार बसेको मन्त्रिपरिषद् बैठकले सिफारिस भएकाहरूमध्ये लामा कार्यकारी निर्देशकमा नियुक्त हुनुभएको हो । सहसचिव बाबुराम भण्डारीको अध्यक्षतामा गठित समितिले लामा सहित अनिता गुरुङ र दीपक ज्ञवालीको नाम सिफारिस गरेको थियो । कार्यकारी निर्देशकका लागि २२ जनाले आवेदन दिएका थिए ।
काभ्रे जिल्लाका स्थायी बासिन्दा अमरध्वज लामाले २०५४ सालमा दिपायल प्रसारण केन्द्रबाट उद्घोषकका रुपमा सेवा सुरु गर्नुभएको थियो । लामाले रेडियो नेपालमा २५ वर्ष सेवा गरेर साढे २ वर्ष अघि वरिष्ठ कार्यक्रम अधिकृतबाट स्वैच्छिक अवकाश लिनुभएको थियो । रेडियो नेपालको बोर्ड सदस्य समेत रहेर काम गर्नुभएका लामासँग संयुक्त राष्ट्रसंघीय रेडियो कार्यक्रमको उत्पादकका रुपमा काम गरेको अनुभव पनि छ ।
लामा मदन भण्डारी फाउण्डेसनमा केन्द्रीय सदस्य, मदन भण्डारी मेमोरियल कलेजका पत्रकारिता विषयका प्राध्यापक तथा रेडियो श्वेत शार्दूलको कार्यकारी प्रमुखका साथै आदिवासी जनजाति पत्रकार महासंघ (फोनिज) का केन्द्रीय उपाध्यक्ष समेत हुनुहुन्छ ।
