काभ्रे, रेडियो रोशी,
काभ्रे जिल्लाको नमोबुद्ध नगरपालिका–४ मा अवस्थित श्री जनक माध्यामिक विद्यालयमा छैटौँ नगरस्तरीय राष्ट्रपति रनिङ शिल्ड प्रतियोगिता–२०८२ सुरु भएको छ । आज नमोबुद्ध नगरपालिकाका नगर प्रमुख कुन्साङ लामाको प्रमुख आतिथ्यता एवम् ४ नम्बर वडाका वडा अध्यक्ष अर्जुन बहादुर कार्कीको सभाध्यक्षतामा प्रतियोगिताको उद्घाटन गरीएको हो । नगरपालिकाको शिक्षा युवा तथा खेलकुद शाखाको आयोजना तथा जनक माध्यामिक विद्यालयको संयोजनमा छैटौँ नगरस्तरीय राष्ट्रपति रनिङ शिल्ड प्रतियोगिता सुरु भएको हो ।
कार्यक्रममा नगरका उपप्रमुख रत्न लामा, प्रमुख प्रशासकीय अधिकृत कृष्ण गिरी, नगरपालिकाका शिक्षा युवा तथा खेलकुद शाखा प्रमुख राम ब तामाङ, वडा नं. १० का वडाध्यक्ष रामकृष्ण उपाध्याय, जनक मा वि का प्रअ प्रदिप पोखरेले शुभकामना मन्तब्य राख्नुभएको थियो । जनक मा.वि का बिद्यार्थीहरुले नृत्य प्रस्तुत गरेका थिए ।
आजबाट सुरु भएको प्रतियोगिता २८ गतेसम्म सञ्चालन हुने बताईएको छ । प्रतियोगितामा छात्र र छात्रा दुबै तर्फ भलिबल, कबड्डी, १००, २००, ४००, ८००, १५०० र ३००० मिटरको रिले दौड, सटफुट ,ज्याबलिङ थ्रो, हाइजम्प, लङजम्प, ट्रीपल जम्प खेलहरु हुने नगरपालिकाका रोजगार संयोजक अमृत खनालले रेडियो रोशीलाई जानकारी दिनुभयो ।
प्रतियोगितामा श्री जनक मा.वि, मधुरापाटी मा.वि, लक्ष्मीनारायण मा.वि, जनकल्याण मा.वि, राम मा.वि, कानपुर मा.वि, सातमुल मा.वि, जनहित मा.वि, दाप्चा मा.वि, कृष्ण मा.वि, बालउन्ज्वल मा.वि, नवप्रतिभा अङ्ग्रेजी.मा.वि, सगुन विद्या मन्दिर अङ्ग्रेजी.मा.वि र श्री जिन सन मि अङ्ग्रेजी.मा.वि गरि १४ वटा बिद्यालयका बिद्यार्थी खेलाडिहरुले सहभागिता जनाएका छन् ।
समुद्घाटन कार्यक्रममा नगरपालिकाका प्रमुख प्रसाशकीय अधिकृत कृष्ण गिरी, नमोबुद्ध नगरपालिका नगर युवा परिषद्का कार्यकारी उपाध्यक्ष रामेश्वर अधिकारी, बिभिन्न वडाका वडा अध्यक्षहरु, सहभागि १४ वटै बिद्यालयका प्रअ, शिक्षक तथा खेलाडिहरु, रेफ्रीहरु लगायतको सहभागिता रहेको थियो । कार्यक्रम भने नगरपालिकाको रोजगार संयोजक अमृत खनालले संचालन गर्नुभएको थियो ।
