काभ्रे,
एकल महिला, वृद्धा तथा दलित समुदायका महिला विभेद र लाञ्छनामुक्त हुन सकेका छैनन् । सभ्य समाजको निर्माणका लागि भनेर तीनै तहका सरकारले कार्यक्रम चलाएको बताए पनि अवस्था जस्ताको तस्तै रहेको प्रभावितहरूको भनाइ छ । पाँचखाल नगरपालिका २ का भवानी खत्रीले श्रीमानको मृत्युपछि समाजबाट विभिन्न आरोप अनि लाञ्छनाको सामना गर्नु परेको बताउनुभयो । तर पनि आफ्नो छोरीको सहारा बन्नु भएका भवानीले अरु प्रभावितको न्यायका लागि लडाइ लडिरहेको उहाँको भनाइ छ । श्रीमानको मृत्युपछि एकल महिला परिवारका सदस्यबाट तिरस्कृत हुनेक्रम नघटेको एकल महिलाहरू बताउँछन् ।
तीन तहको सरकारको अभ्यास भएको ५ वर्ष बितिसक्दा पनि सोचे जतिको परिवर्तन नदेखिएको एकल महिला काभ्रेका अध्यक्ष रामदेवी तामाङले बताउनुभयो । काभ्रेमा एकल महिलाको सङ्ख्या १३ हजार छ । जिल्ला प्रहरी कार्यलय काभ्रेका अनुसार गत साउनदेखि अहिलेसम्ममा जिल्लामा ७४ ओटा घरेलु हिंसाका घटना दर्ता भएका छन् । प्रभावितहरूलाई समुदायको साथ नहुँदा पनि हिंसामा परेकाहरू न्यायका लागि खुल्न नसकेको प्रहरी प्रशासनको भनाइ छ ।
