काभ्रे,
प्रधानमन्त्री बालेन्द्र शाहले श्रम, रोजगार तथा सामाजिक सुरक्षामन्त्री दीपककुमार साहलाई बर्खास्त गर्नुभएको छ । स्वास्थ्य बीमा बोर्डको सदस्य नियुक्तिसम्बन्धी विवाद सार्वजनिक भएपछि सत्ताको नेतृत्व गरेको दुई हप्तामै प्रधानमन्त्री शाहले श्रममन्त्रीलाई बर्खास्त र स्वास्थ्यमन्त्री निशा मेहतालाई चेतावनी दिनुभएको हो । प्रधानमन्त्री बालेन्द्र शाहका प्रेस तथा अनुसन्धान विज्ञ दीपा दाहालकाअनुसार राष्ट्रिय स्वतन्त्र पार्टीको सिफारिशमा मन्त्री साहलाई पदमुक्त गरिएको हो । रास्वपाका सभापति रवि लामिछानेको हस्ताक्षर रहेको पत्रमा प्रधानमन्त्रीलाई सम्बोधन गर्दै कारबाहीको सिफारिश गरिएको थियो । महोत्तरी–२ बाट निर्वाचित दीपककुमार साहले पदीय मर्यादाको दुरुपयोग गरी लामो समयदेखि निष्क्रिय राखिएको स्वास्थ्य बीमा बोर्डको सदस्यमा श्रीमती जुनु श्रेष्ठलाई नियमित काम गराएको पार्टीको अनुशासन कमिटीको अध्ययनबाट देखिएको पत्रमा उल्लेख छ ।
त्यसैगरी आफ्नो जिम्मेवारी निर्वाह गर्दा अपेक्षित गम्भीरता नदेखाएको भन्दै रास्वपा सभापति लामिछानेले स्वास्थ्य तथा जनसङ्ख्यामन्त्री निशा मेहतालाई समेत सचेत गराउन प्रधानमन्त्री साहसमक्ष सिफारिश गर्नुभएको थियो । सिफारिशका आधारमा प्रधानमन्त्री साहले मन्त्री मेहतालाई सचेत गराइसक्नुभएको छ ।
