काभ्रे,रेडियो रोशी,
गत साताको बाढीले क्षतिग्रस्त नारायणटार र चण्डीबेंसी क्षेत्रको पुनःनिर्माण कार्यलार्ई तीव्रता दिइएको छ। सडक विभाग र रोशी गाउँपालिकाको संयुक्त पहलमा सोमबारदेखि सडक सरसफाइ तथा मर्मत कार्य सुरु गरिएको हो । बाढीले बगाएर ल्याएको गेग्रान, ढुङ्गा र माटो पन्छाउन अहिले सडक विभागले उपलब्ध गराएको एउटा स्काभेटर र दुईवटा ट्रिपरले बाटोमा थुप्रिएको अवरोध हटाउने काम भईरहेको वडा नं २ का वडा अध्यक्ष हस्तमान लामाले जानकारि दिनुभयो । हालको गतिमा काम भए आगामी एक हप्ताभित्र पुनःनिर्माणका कार्यहरू सम्पन्न हुने लक्ष्य राखिएको छ।
बाढीले रोशी १ र २ का सडक सञ्जालमा क्षति पु¥याउनुका साथै स्थानीयका घर र आँगन समेत पुरेको थियो। प्राकृतिक विपत्तिका कारण दुई दिनसम्म उक्त क्षेत्रमा यातायात पूर्ण रूपमा ठप्प बनेको थियो। “अहिले सडकमा थुप्रिएको ढुङ्गा–माटो पन्छाएर बस सञ्चालनमा आइसकेका छन्,”– वडा अध्यक्ष लामाले भन्नुभयो ।
खोलाको किनारमै मानब बस्ती रहेका कारण सामान्य वर्षामा समेत यो क्षेत्र जोखिममा पर्ने गरेको छ। सानोतिनो वर्षाले पनि सडक अवरुद्ध हुने र बस्तीमा लेदो पस्ने समस्या दोहोरिइरहने गरेको वडा अध्यक्ष लामाले भन्नुभयो ।
