काभ्रे,रेडियो रोशी,
काभ्रे जिल्लाको रोशी गाउँपालिकाले आर्थिक बर्ष २०८२÷०८३ को नीति, कार्यक्रम र बजेट तर्जुमा सम्बन्धी सरोकारवालाहरुसँग अन्तरक्रिया तथा छलफल गरेको छ । आज गाउँपालिका अध्यक्ष दिनेस लामाको अध्यक्षतामा सरोकारवालासँग अन्तरक्रिया तथा छलफल गरीएको हो । आगामी आर्थिक वर्षको लागि यथार्थपरक, समावेशी र जनमुखी नीति, कार्यक्रम र बजेट निर्माणको लागि सरोकारवालाहरुसँग अन्तरक्रिया गरीएको हो ।
कार्यक्रममा सहभागीहरूले विपद ब्यवस्थापन, शिक्षा, स्वास्थ्यको क्षेत्रमा बजेट बढाउनुपर्ने, पर्यटन, कृषि, पुँजीगत र चालु खर्च ब्यवस्थापन, पालिका स्तरीय कार्यक्रमहरु छनौट गरी कार्यान्वयन गर्ने, युवा स्वरोजगारका अवसरहरू सिर्जना लगायतका बिषयहरुमा छलफल एवं धारणाहरु प्रस्तुत गरेका थिए ।
कार्यक्रमलाई सम्बोधन गर्नुहुदै गाउँपालिका अध्यक्ष दिनेस लामाले ‘रोशीको नीति पर्यटन र कृषि’ भन्ने मूल नारालाई सार्थकता दिने खालको आगामी बजेट नीति तथा कार्यक्रम निर्माणको लागि अन्तरक्रिया कार्यक्रमको आयोजना गरीएको बताउनुभयो । आगामी आर्थिक वर्षको नीति, कार्यक्रम र बजेटलाई थप जनमुखी बनाउन अन्तरक्रिया कार्यक्रमले मद्दत पुग्ने बताउनुभयो । उहाँले आगामी बजेटले गाउँपालिकाको समग्र विकासमा महत्वपूर्ण भूमिका खेल्ने बताउनुभयोे ।
गाउँपालिका उपाध्यक्ष मिमबहादुर वाइबाले समृद्ध रोशी निर्माणको लागि राम्रो नीति, कार्यक्रम र बजेट बनाउन अन्तरक्रिया कार्यक्रमको आयोजना भएको बताउनुभयो ।
वडा न १२ का वडाध्यक्ष एव गाउँपालिका प्रवक्ता बसन्त कुमार तामाङले सार्वजनिक जग्गा बचाउनको लागि स्थानीय तहदेखी नै नीति बनाएर अगाडी बढ्नुपर्नेमा जोड दिनुभएको छ ।
अन्तरक्रियाको क्रममा प्राप्त सुझावहरूलाई आर्थिक बर्ष २०८२÷०८३ को नीति, कार्यक्रम र बजेट निर्माणमा समावेश गरीने गाउँपालिकाका प्रमुख प्रशासकीय अधिकृत शिव प्रसाद भन्तनाले बताउनुभयो।
कार्यक्रममा बिभिन्न वडाका वडा अध्यक्षहरु, रोशी उद्योग बाणिज्य सँघका अध्यक्ष मनिष बल, नेपाली कांग्रेस रोशी गाउँपालिका सभापति दुधराज घलान, राष्ट्रिय प्रजातन्त्र पार्टि रोशीका सभापति लोकनाथ गौतम, पालिकाका सम्पुर्ण शाखाका शाखा प्रमुखहरुले नयाँ बजेट निर्माणको लागि सुझावहरु दिएका थिए ।
