काभ्रे,
दशैंको अवधिभर काभ्रेमा टिपर सञ्चालनमा रोक लगाउने निर्णय भएको छ । असोज १४ गतेदेखि २४ गतेसम्म टिपर सञ्चालनमा रोक लगाउने निर्णय भएको हो । दशैंको समयमा सडकमा यातायात व्यवस्थापनलाई सहज बनाउन यस्तो निर्णय गरिएको जिल्ला प्रशासन कार्यालय काभ्रेले जनाएको छ । चाडपर्वलाई लक्षित गरी सार्वजनिक यातायातको भाडादर, यात्रु सिट क्षमताका आधारमा अनलाईन टिकेटिङ् र कोभिडसम्बन्धी स्वास्थ्य मापदण्ड पालना गरी÷गराई यात्रा व्यवस्थापन लगायतका कार्यहरु गर्ने र सडक दुर्घटना न्यूनीकरण गर्ने, यात्रु ओसार पसार गर्न सार्वजनिक यातायातमा मास्क लगाएका यात्रुलाई मात्र चढाउने, सवारी साधनमा सेनिटाइजरको अनिवार्य व्यवस्था मिलाउने र यात्रुहरुलाई सकेसम्म सामाजिक दुरी कायम गर्न शुरुमै जानकारी गराउने व्यवस्था मिलाउने निर्णय पनि भएको छ
यस्तै सार्वजनिक यातायातलाई थप प्रभावकारी बनाउन जिल्ला प्रहरी कार्यालय र जिल्ला ट्राफिक प्रहरी कार्यालयले यात्रु सहायता कक्ष सञ्चालन गर्ने, यात्रु सिट क्षमताका आधारमा यात्रा गराउन स्वयं सेवकहरुको परिचालन गर्ने, यातायात भाडादरलाई पारदर्शी बनाउने, नियमित चेकजाँच र अनुगमन गर्ने र सोको लागि सम्पूर्ण यातायात व्यवसायीहरुले समन्वय गरी हाल निर्धारित भाडादर जिल्ला प्रशासन कार्यालय, जिल्ला प्रहरी कार्यालय र ट्राफिक कार्यालयमा उपलब्ध गराउने निर्णय भएको छ । बैठकले अरनिको र विपी राजमार्गमा सञ्चालन हुने यात्रुबाहक सवारीसाधनका लागि टाइम कार्ड लागु गर्ने निर्णय पनि भएको छ ।
