काभ्रे,
लोकतान्त्रिक वाम गठबन्धन काभ्रे क्षेत्र नं. १ का प्रतिनिधि सभा सदस्यका उम्मेदवार सुर्यमान दोङ (लालध्वज)ले मतदाताहरूले दिएको सम्मान र मतलाई कुनै पनि भ्रष्टाचारको धब्बा लाग्न नदिने बताउनुभएको छ । हिजो (शनिवार) नामेबुद्ध नगरपालिका वडा नं. ६ धुवाकोट फेदी र वडा नं. ७ काक्रेमा लोकतान्त्रिक वाम गठबन्धनको चुनावी कार्यक्रममा उँहाले यस्तो बताउनुभएको हो । ‘काभ्रेको समग्र राजनीतिलाई बुझेका र अनुभवी हामी अगाडी आएका छौँ । हामीले अहिलेसम्म कुनै भ्रष्टाचारको धब्बा लगाएका छैनौँ र आगामी दिनमा पनि कुनै भ्रष्टाचारको धब्बा लाग्न दिने छैन् ।’ उँहाले भन्नुभयोे, ‘तपाईहरूले दिएको मत र तपाईहरूले उठाएको झण्डालाई इतिहासमै निहुरिन दिनेछैनौँ ।’ मतदाताहरूले दिएको इज्जतलाई कहिल्यै अपहेलना र कलंकित हुन नदिने उँहाले प्रतिबद्धता ब्यक्त गर्नुभएको छ ।
तिनै तहका सरकार मिलेर छलफल गरी बिकासका निर्माणका कामहरू अगाडी बढाउने काम गर्ने उँहाको भनाई छ । आफुले विगतमा गरेको प्रतिबद्धताहरू क्रमश सम्पन्न हुदै गएको र आगामी दिनमा बाँकी बिकास निर्माणका कामहरू सम्पन्न गर्नको लागि पनि गठबन्धनको उम्मेदवारहरूको जित आवश्यक रहेको उँहाले बताउनुभयो । जनताले अनुभुति गर्ने खालको काम गर्ने उनको भनाई छ ।
