काभ्रे,
रोशी गाउँपालिकाको आर्थिक सहयोग र नाङ्शाल एशोसियसन नेपालको प्राविधिक सहयोगमा प्रारम्भिक साक्षरता र गणित सम्बन्धि ७ दिने तालिम सम्पन्न भएको छ । रोशी गाउँपालिकाभित्रको ७० ओटै बालविकासका शिक्षकहरुको पेसागत तथा शिक्षण सीप विकासको अभिवृद्धिको निम्ति उक्त तालिम प्रदान गरिएको हो । रोशी गाउँपालिकाको अध्यक्ष दिनेश लामाको प्रमुख आतिथ्यतामा उक्त तालिम सम्पन्न भएको हो । समापन शत्रको क्रममा अध्यक्ष दिनेश लामाले राष्ट्र विकासको प्रमुख आधार शिक्षा र शिक्षाको प्रमुख आधार प्रारम्भिक बालविकास भएको हुँदा रोशी गाउँपालिकाभित्रका सबै बालविकासको सर्वाङ्गीण विकास र बाल अधिकारको सुनिश्चितताको निम्ति प्रत्येक वर्ष बालकक्षाका शिक्षकहरुलाई तालिम प्रदान गर्दै आइरहेको बताउनुभयो ।
गाउँपालिकाले शिक्षकहरुका निम्ति तालिम मात्र नभई राज्यले निर्धारण गरिएको सेवा सुविधा संघ, प्रदेशको साथै स्थानीय सरकारले पनि थप गरेर उपलब्ध गराउँदै आएको बताउनुभयो । राज्यले निर्धारण गरेको न्यूनतम मापदण्डलाई पूर्णता दिन र तालिमको सहि सदुपयोग तर्फ उन्मुख गराउन जनप्रतिनिधि तथा सम्बन्धि सरोकारवाला निकायले निरीक्षण, अनुगमन, मूल्यांकनतथा पृष्ठपोषण प्रदानगर्दै आएको बताउनुभयो ।
तालिममा विशेष गरी बालबालिकाको वृद्धि र विकास, सर्वाङ्गीण विकास, बाल मनोविज्ञान, शिक्षण सिकाइ पद्धति, एकिकृत शिक्षण सिकाइ, पाठ्क्रममा आधारित वार्षिक विषयवस्तु, दैनिक कार्यतालिका , कक्षाकोठा व्यवस्थापन, शैक्षिक सामग्री निर्माण, ६ सिकाई क्षेत्रको व्यवस्थापन र क्रियाकलाप, बालबालिकाको समस्या पहिचान र उपचारात्मक विधि, अभिभावक शिक्षा, निरन्तर मूल्यांकन जस्ता विषयमा छलफल तथा क्रियाकलाप भएको रोशी गाउँपालिकाको ई.सि.डि. सुपरभाईजर सृजना तामाङले जानकारी दिनुभएको छ । तालिमको सहजिकरण भने सेतो गुराँस राष्ट्रिय बालविकास सेवाको तालिम अधिकृत रमा थपलिया र बालविशेषज्ञ छवी चौलागाईले गर्नुभएको सुपरभाईजर तामाङले जानकारी दिनुभयो ।
