काभ्रे,
नेपाली कांग्रेसका सभापति तथा काभ्रे–१ प्रदेशसभा (ख) का उम्मेदवार तीर्थ लामाले सहिदका सपनाहरु पूरा गर्नका लागि पनि लोकतान्त्रिक वाम गठबन्धनका उम्मेदवारहरुलाई मतदान गर्नुपर्ने धारणा राख्नुभएको छ । धुलिखेल नगरपालिका ९ मा आयोजित मतदाता भेटघाट तथा घरदैलो अभियानलाई सम्बोधन गर्दै उँहाले व्यवस्था ल्याउन हजारौं सहिदहरुले रगत बगाएको स्मरण गराउदै उनीहरुले सुन्दर नेपालको परिकल्पना गरेर बलिदान गरेको हुनले ती सहिदहरुको सबै सपना पूरा गर्न लोकतान्त्रिक वाम गठबन्धनका साझा उम्मेदवारहरुलाई मतदान गर्नुपर्ने धारणा राख्नुभएको हो ।
‘आज हामी जुनु व्यवस्थामा छौँ यो व्यवस्था ल्याउन मृत्युको कुनै प्रवाह नगरी जनयुद्ध लडेका लालध्वज यो क्षेत्रमा मत माग्न आउनु भएको छ, संगै म रुख चिन्ह लिएर प्रदेशसभा सदस्यको लागि मत माग्न आएको छु, हामीले जिते मात्रै जनभावना अनुरुप काम हुनेछ, तपाईंहरुले केही दिन खट्नुस् हामी पाँच वर्ष तपाईंहरुको लागि खट्नेछौं ।’ लामाले भन्नुभयो ।
विगतमा ओलीले नेतृत्व गरेको नेकपालाई जनताले बहुमत दिँदा दुई दुई पटक संविधानको हत्या गर्ने प्रयास गरेकाले संविधानको हत्याराहरुलाई मत दिएर सहिदको सपना पूरा नहुने जिकिर गर्नुभएको छ । कार्यक्रममा माओवादी केन्द्रका पोलिटब्युरो सदस्य एवं काभ्रे –१ का प्रतिनिधिसभाका उम्मेदवार सुर्यमान दोङ लालध्वजले जनताको पहुँचभन्दा आफूहरु कहिल्यै टाढा नरहने बताउनुभएको छ ।
