काभ्रे,
उच्च शिक्षा हासिल गर्न काभ्रे आएका चेपाङ बालबालिकाहरुले उच्च शिक्षा पश्चात समुदायको विकास गर्नेे सपना देखेका छन् । राप्ती नगरपालिका १३ स्थित अति विकट कान्दाका बालबालिका माध्यमिक तहको शिक्षाको लागि काभ्रे आएका छन् । कान्दाका ५९ जना बालबालिका लक्ष्मी प्रतिष्ठानले सञ्चालन गरेको कुमार बलराम स्मृति छात्रावासमा बसेर स्थानीय सरस्वति माध्यामिक विद्यालयमा पढिरहेका छन् । अध्ययनसँगै आफ्नो गाउँको मुहार फेर्ने खाका समेत कोरिरहेको चेपाङ बालबालिकाहरुले बताएका छन् ।स्थानीय विष्णु गौतमले बालबालिकाको लागि अध्ययनको अवसर मिलाईदिनुभएको हो । गौतमले प्रतिष्ठान मार्फत चितवन र काभ्रेका गरि १ सय ९६ जना बालबालिकालाई संरक्षण गरिरहनुभएको छ ।
बालबालिकालाई शिक्षासँगै स्वावलम्बनका कार्यमा समेत जोडिएको छ । उनीहरूलाई ‘कपाल काट्ने, कृषि उत्पादन, पाउरोटी उत्पादन, पशुपालन, वायरियङ्ग, टेलरिङ्ग, फर्निचरलगायतका विषयमा तालिम दिइएको छ । उच्च शिक्षाकै लागि जिल्ला छाडेका बालबालिकाले पढेर नेताको नजरमा पर्न नसकेको गाउँको मुहार फेर्ने बताएका छन् ।
