काभ्रे,
नमोबुद्ध नगरपालिकामा १४ सय ६८ जनाले कोरोना विरुद्धको बुष्टर मात्रा खोप लगाएका छन् । सोमबार र मंगलबार नगरपालिकाका सबै स्वास्थ्य संस्थामा लगाएको खोपमा ४ सय ५६ जनाले पहिलो बुष्टर र १ हजार १२ जनाले दोस्रो बुष्टर मात्राको खोप लगाएको नमोबुद्ध नगरपालिकाको शाखा प्रमुख नवराज दाहालले जानकारी दिनुभयो ।
यसअघि जोन्सन एण्ड जोन्सन खोपको पहिलो मात्रा र अन्य खोपको दोस्रो मात्रा लगाएको ३ महिना पुरा भएका ५५ बर्ष वा सो भन्दा माथिको उमेर समूहका मानिसहरुलाई उक्त खोप लगाइएको थियो । नगरमा उपलव्ध १८ सय मात्रा खोप मध्ये बाँकी खोप पुनः लगाइने उनले जानकारी दिनुभएको छ । पछिल्लो समय कोरोनाको नयाँ भेरिन्ट पत्ता लागेसंगै कोरोना संक्रमण पनि पुन देखा पर्न थालेको छ । संघीय सरकारले पहिलो मात्रा बुष्टर खोप लगाएको ६ महिना पुरा भएकाहरुलाई पनि दोस्रो मात्रा खोप लगाउन भनेको छ ।
