काभ्रे,
आज विश्व प्रेस स्वतन्त्रता दिवस मनाइँदैछ । दिवसको अवसरमा नेपालसहित विश्वभर विभिन्न कार्यक्रम आयोजना गरिदैछ । युनेस्कोले यस वर्षको नारा “भविष्यको अधिकार सुनिश्चितता ः मानव अधिकारको संवाहक अभिव्यक्ति स्वतन्त्रता” तय गरेको छ । दिवसको अवसरमा प्रधानमन्त्री पुष्पकमल दाहाल ‘प्रचण्ड’ ले सञ्चार क्षेत्रले मर्यादित, जिम्मेवार र जवाफदेही बनाउन स्वनियमन प्रणालीको विकास गर्न आग्रह गर्नुभएको छ ।
युनेस्कोको आयोजनामा अफ्रिकी राष्ट्र नामिबियाको विन्डहक सहरमा भएको पत्रकारहरूको सम्मेलनले ‘बहुलवादी र स्वतन्त्र प्रेसको लागि विण्डहक घोषणापत्र’ जारी गरेको सम्झनामा सन् १९९३ देखि संयुक्त राष्ट्र सङ्घले यो दिवस मनाउने निर्णय गरेको थियो । यो निर्णयसँगै आजको दिनलाई प्रेस तथा अभिव्यक्ति स्वतन्त्रताका पक्षधरले महत्वपूर्ण दिनका रूपमा लिन्छन् । दिवसको अवसरमा सामुदायिक रेडियो प्रसारक सङ्घ अकोराबले मानवअधिकार रक्षाका लागि प्रेस तथा अभिव्यक्ति स्वतन्त्रताका विषयमा दिउँसो १ बजे छलफल कार्यक्रम गर्दैछ । कार्यक्रम अकोराबको सभाकक्षमा हुनेछ ।
