काभ्रे,
अबको तीन दिन पानी पर्ने क्रम कम हुने भएकाले गर्मी बढ्ने मौसमविद्ले बताएका छन् । स्थानीय र पश्चिमी वायुको प्रभावले देशका थोरै ठाउँमा हल्का पानी परेपनि ठूलो पानी पार्ने सम्भावना कतै पनि नरहेको मौसम पूर्वानुमान महाशाखाले जनाएको छ । महाशाखाका वरिष्ठ मौसमविद् प्रतिभा मानन्धरले पानी पर्न कम भएसँगै देशभरीकै तापक्रम बढ्ने बताउनुभयो ।
मधेस र लुम्बिनी प्रदेशका केही ठाउँमा हावाहुरी पनि चल्ने उहाँले जानकारी दिनुभयो । महाशाखाका अनुसार हिजो सबैभन्दा धेरै सिमराको अधिकतम तापक्रम ४१ दशमलव २ डिग्री सेल्सियस र भैरहवाको ४० दशमलव ९ डिग्री सेल्सियस मापन गरिएको थियो । अरु धेरै ठाउँको पनि तापक्रम ४० डिग्री सेल्सियसको हाराहारी पुगेको थियो ।
