काभ्रे,
नवौं अन्तर्राष्ट्रिय योग दिवसको अवसर पारेर आज काठमाण्डौ विश्वविद्यालय (केयु) ले पनौती नगरपालिका वडा नम्बर ५ चौकोटमा निर्माण गरेको योग तथा प्राकृतिक चिकित्सालयको उद्घाटन गरिने भएको छ । स्वास्थ्य तथा जनसंख्या मन्त्री मोहन बहादुर बस्नेतले चिकित्सालयको उद्घाटन गर्नु हुनेछ ।
उद्घाटन कार्यक्रम दिउँसो १ बजेका लागि तय गरिएको केयुका प्राज्ञिक औद्योगिक संयोजक डाक्टर राम लामाले जानकारी दिनुभयो । संयुक्त राष्ट्रसंघको महासभाले सन् २०१४ मा गरेको निर्णयअनुसार सन् २०१५ जुन २१ देखि अन्तर्राष्ट्रिय योग दिवस मनाउन थालिएको हो । योग, ध्यान र आयुर्वेदका माध्यमबाट मानसिक शान्ति एवं स्थिरता र आरोग्यताको प्राप्ति हुने विज्ञहरु बताउदछन् ।
