काभ्रे,
रोशी गाउँपालिका वडा नं. ६ स्थित सिपालीमा कृषकहरुलाई अनुदानमा कृषि औजार तथा सामाग्री वितरण गरिएको छ । गाउँपालिका अध्यक्ष दिनेश लामाको प्रमुख आतिथ्यतामा सम्पन्न कृषिऔजार वितरण कार्यक्रममा श्री घट्टेखोलो दूध संकलन तथा चिस्यान केन्द्र सहकारी संस्था लि.मा आबद्ध कृषकहरुलाई कृषिऔजार तथा सामाग्रीहरु वितरण गरिएको हो । कार्यक्रममा गाउँपालिकाको ५० प्रतिशत अनुदान कार्यक्रम अन्तर्गत मिनि टिलर ४ थान, पोलिपाइप ६ थान वितरण गरीएको छ । त्यसैगरी, प्लास्टिक टनेल ४ थान, बीउ बिषादी २३ जनालाई, क्रेट २० थान, स्पेयर पम्प २० थान, असल किसान प्रोत्साहन कार्यक्रम अन्तर्गत रु.४८,२६५।– का दरले १५ जना कृषकहरुलाई, वागमती प्रदेश दूध तथा मत्स्य विकास बाट दुग्ध किसानहरुकालागि एकमुष्ट रु.३५,६८,५३२।– अनुदान, जिल्ला भेटेनरी यान्त्रिकरण कृषिकार्यक्रम अन्तर्गत च्यापकटर ६ थान र प्रधानमन्त्री कृषि आधुनिकिरण कार्यक्रम अन्तर्गत च्यापकटर १० थान वितरण गरिएको रोशी गाउँपालिका कृषि विकास शाखा प्रमुख समिता तामाङले जानकारी दिनुभयो ।
कार्यक्रममा विशिष्ट अतिथि गाउँपालिका उपाध्यक्ष मिमबहादुर वाईवा, अतिथिहरु प्रमुख प्रशासकीय अधिकृत रामबहादुर तामाङ, वडा नं. ६ का वडा अध्यक्ष नारायण बहादुर शिवाकोटी, वडा नं. ७ का वडा अध्यक्ष अशोक गौतम, प्रेस युनियनका पूर्व उपाध्यक्ष ईश्वरी ओझा लगायतको उपस्थिती रहेको थियो । उक्त कार्यक्रम जिल्ला समन्वय समितिका उप–प्रमुख तथा श्री घट्टेखोलो दूध संकलन तथा चिस्यान केन्द्र सहकारी संस्था लि.का अध्यक्ष रिम बहादुर लामाको सभापतित्वमा सम्पन्न भएको हो ।
