काभ्रे,
काभ्रे जिल्लाको रोशी गाउँपालिकाले लम्पि स्किन रोगबाट पिडित किसानलाई राहत उपलब्ध गराउन प्रदेश र संघ सरकारसँग अनुरोध गरेको छ । लम्पि स्किन रोगको कारण गाउँपालिकामा हालसम्म ४६ वटा गाइबस्तु मरिसकेका छन् ।
जिल्ला समन्वय समिति मार्फत प्रदेश र संघ सरकारलाई पीडित किसानहरुलाई तत्काल राहत उपलब्ध गराउन अनुरोध गरिसकेको गाउँपालिका अध्यक्ष दिनेस लामाले बताउनुभयो । ‘आदरणीय रोशी बासी आमाबुबा, दिदिबहिनी तथा दाजुभाइहरु, जेठको अन्तिम हप्तादेखि नै गाईभैसीमा महामारीको रूपमा फैलिएको लम्पि स्किन रोगको उपचार र रोकथाम लागि गाउँपालिका निरन्तर लागि परेको छ ,त्यसको बाबजुद रोशीमा हिजोसम्म ४६ वटा गाइबस्तु मरिसकेको छ ,यसबाट किसानहरु अत्यन्तै पिडामा छ्न् , सिमित स्रोतको बाबजुद गाउँपालिकाले त्यो पिडामा मल्हम लगाउने प्रयास मात्र गरेको हो त्यो रकम पर्याप्त होइन’—अध्यक्ष लामाले भन्नुभयो—‘जिल्ला समन्वय समिति मार्फत हामीले प्रदेश र संघ सरकारलाई पीडित किसानहरुलाई तत्काल राहत उपलब्ध गराउन अनुरोध गरिसकेका छौं । अवश्य प्रदेश र संघ सरकारले पनि यसको सम्बोधन गर्नेछ । यस्तो देशव्यापी फैलिएको महामारीमा संयमित र सजग रहन अनुरोध गर्दछु’
गाउँपालिकाभित्र हालसम्म ४०७ वटा पशुहरु लम्पि स्किन रोगबाट संक्रमित भएको जसमध्ये ३६१ वटा पशुहरु निको भएको ,४६ वटा पशुहरु मरेको तथा २ वटा पशुहरुको उपचार भईरहेको गाउँपालिका पशु सेवा शाखा प्रमुख रघुनी साहले जानकारी दिनुभयो । हालसम्म एक हजार पशुहरुमा लम्पि स्किन रोग बिरुद्धको खोप लगाईएको छ ।
यसअघि गाउँपालिकाले गाईभैसीमा लाग्ने लम्पी स्किन रोगबाट क्षती बेहोरेका किसानहरूलाई राहत दिने निणर्य गरीसकेको छ । साउन २६ गत शुक्रबार बसेको रोशी गाउँपालिकाको कार्यपालिका बैठकले सो निणर्य गरेको हो । गाउँपालिकाका अध्यक्ष दिनेश लामाका अनुसार लम्पी स्किन रोगबाट गाई भैसी मरेमा राहत उपलब्ध गर्ने छ । कार्यपालिकाको बैठकले भैसी मरेको किसानलाई ७ हजार र गाई मरेको किसानलाई ५ हजार राहत दिने निणर्य गरेको लामाले बताउनुभयो । ‘कार्यपालिका बैठकले लम्पी स्किन रोगबाट गाई भैसी मरेको किसानलाई राहत दिने निणर्य गरेका छौँ ।’ गाउँपालिका अध्यक्ष लामाले भन्नुभयो —‘भैसी मरेका किसानलाई ७ हजार र गाई मरेका किसानलाई ५ हजार उपलब्ध गराउने निणर्य गरेका छौँ ।’ किसानको पूरै क्षतिपूर्ती नभएपनि केही राहत मिल्ने लामाले बताउनुभयो । उक्त रोगबाट पशु क्षती बेहोरेका किसानलाई गाउँपालिकाको विपद व्यवस्थापन कोषबाट उपलब्ध गराउने अध्यक्ष उँहाले जानकारी दिनुभयो ।
