काभ्रे,
स्वस्थ्य कार्यालय काभ्रेपलाञ्चोकले मानसिक स्वास्थ्य तथा आत्महत्या न्यूनीकरण गर्नका लागि सरोकारवालाहरुसँग बृहत् छलफल एवं अन्तरक्रिया गरेको छ । आर्थिक वर्ष २०८०÷२०८१ को ४० दिन नपुग्दै २२ जनाले आत्महत्या गरेपछि त्यसको न्यूनीकरणका लागि मानसिक स्वास्थ्य तथा आत्महत्या न्यूनीकरणमा सबै पक्षको उत्तिकै भूमिकाका लागि बृहत् छलफल गरिएको स्वास्थ्य कार्यालय काभ्रेका प्रमुख वरिष्ठ स्वास्थ्य प्रशासक डा. पुरुषोतम राज सेढाईले जानकारी दिनुभयो । डा. सेढाईले जिल्लामा भएका आत्महत्यासम्वन्धी तीन वर्षे तथ्याङ्क विश्लेषण सहित प्रस्तुत गर्नुको साथसाथै आत्महत्याको सङ्ख्या, पालिकागत अवस्था, उमेर, लिङ्ग, पेसा, समय, बार, महिनाका आधारमा जिल्लामा भएका घटना, त्यसको न्यूनीकरणका लागि भएका प्रयास र अवस्थाका बारेमा जानकारी गराउनुभएको थियो ।
एक पटक आत्महत्याको प्रयास गरेको व्यक्तिले ३ देखि १० वर्षको बिचमा पुनः आत्महत्याको प्रयास गरेको चिकित्सकहरुको भनाई छ । शिर मेमोरियल अस्पतालकी मेडिकल डाइरेक्टर डा.एन्जिला बस्नेतले विष सेवन गरेर मर्नेहरुको सङ्ख्या केही वर्ष अघिसम्म धेरै भए पनि पछिल्लो समयमा झुन्डिएर आत्महत्या गर्नेहरु धेरै भएको बताउनुभयो ।
कार्यक्रममा धुलिखेल अस्पतालमा कार्यरत फरेन्सिक डा. पंकजकुमार शाहले परिवारका सदस्य वा नजिकका आफन्तले गरेको आत्महत्या पछि अर्काे घटना हुने गरेको बताउनुभएको छ । उहाले आत्महत्या गरेका ब्यक्तिहरुको केही बाहेक अधिकांशको प्रकृया मात्रै पुरा गरेकाले त्यसको व्यवस्थापनमा अझै ध्यान दिनु पर्ने बताउनुभयो । कार्यक्रममा सुरक्षा निकायका प्रतिनिधिहरु, पालिकाका स्वास्थ्य शाखा प्रमुखहरु, संचारकर्मी तथा सरोकारवाला निकायका प्रतिनिधिहरु सहभागी भएका थिए ।
