रोशी सहकर्मी–जेठ ३०,
२०७७,काभ/

नेपाल विद्युत प्राधिकरण पाँचखाल वितरण केन्द्रले जीर्ण अवस्थामा पुगेका ३५ सय काठका विद्युतीय पोल फेरेको छ । वितरण केन्द्रले गत पुस यता मुख्य लाइनका होचा तथा जीर्ण भइ ढल्न लागेका काठका विद्युतीय पोल फेरको हो ।

पुराना पोल फेरी स्टिल तथा सिमेन्टका पोल राखेर लाइनको स्तरोन्नति गरेको वितरण केन्द्र प्रमुख मेघनाथ ढकालले बताए । उनका अनुसार वितरण केन्द्रले अहिलेसम्ममा मुख्य लाइन (एचटी) का ३ सय पुराना पोल फेरिसकेको छ ।
‘कुनै बेला हरियो रुख र बाँस गाडेर घर–घरमा विद्युत पुर्याउने काम गरियो,’ उनले भने,‘अहिले तीनै पोल जीर्ण भई विद्युतीय दुर्घटना बढ्न थालेपछि स्टिल र सिमेन्टका पोल राखेर वितरण लाइनको स्तरोन्नति गरिरहेका छौं ।’ उनले वितरण केन्द्र अन्तर्गत पर्ने स्थानीय तहका करिब ७० प्रतिशत जीर्ण पोल फेर्ने काम सकिएको बताए ।

कोरोनाभाइरसको संक्रमण रोक्न गरिएको लकडाउन अवधिमा पनि जीर्ण पोल फेरेर लाइनको स्तरोन्नति गरिएको उनले बताए । आगामी आर्थिक वर्षमा थप २ हजार जीर्ण जिर्ण पोल हटाउने योजना छ । वितरण केन्द्रले पुसमा स्थानीय तहसँग सम्झौता गरेर जीर्ण विद्युतीय पोल फेर्ने सहमति गरेको थियो । अबको डेढ वर्षभिम सबै काठका जीर्ण पोल फेरेर स्टिल र सिमेन्टका पोल राखिसक्ने लक्ष्य रहेको ढकालले जानकारी दिए ।

यस्तै, वितरण केन्द्रले यो वर्ष विद्युत चोरीमा संलग्न साढे ५ सय ग्राहकलाई कारबाही गरी १४ लाख रुपैयाँ जरिवाना असुलेको छ । साथै, २ सय विपन्न परिवारलाई निशुल्क विद्युत मिटर वितरण गरिएको छ । यो वर्ष वितरण केन्द्रका १ हजार ५ सय नयाँ ग्राहक थपिएका छन् । १ हजार ५० वटा बिग्रिएका विद्युत मिटर बदली गरिएको छ ।

Facebook Comments Box