काभ्रे,
सरकारले कडा रोगका बिरामीको उपचारका लागि उपलब्ध गराउँदै आएको सहुलियतलाई प्रभावकारी बनाउन विपन्न नागरिक औषधि उपचार निर्देशिका, २०८० जारी गरेको छ । ६ मंसिरमा स्वास्थ्य तथा जनसंख्या मन्त्रालयले मन्त्रीस्तरीय निर्णय गर्दै विपन्न नागरिक औषधि निर्देशिका, २०८० स्वीकृत गरेको हो । १५ जेठमा प्रस्तुत चालु आर्थिक बर्षको बजेट वक्तव्यमा स्वास्थ्यसँग सम्बन्धित सामाजिक सुरक्षाका कार्यक्रम र स्वास्थ्य बीमाका बीच दोहोरोपन नहुने गरी कार्यविधि बनाउने र स्वास्थ्यको सामाजिक सुरक्षाका कार्यक्रमलाई क्रमशः स्वास्थ्य बीमाको दायरामा ल्याउने घोषणा गरेको थियो । सरकारले कडा रोगको उपचार खर्च स्वास्थ्य बीमामार्फत ब्यहोर्दै आएको थियो । तर, पुनः स्वास्थ्य मन्त्रालयले निर्देशिका जारी गर्दै कडा रोगको उपचार खर्चको कार्यक्रम विपन्न कार्यक्रम अन्तर्गत नै ल्याएको हो ।
निर्देशिकामा मुटु रोग, मिर्गौला रोग, क्यान्सर, पार्किन्सन्स, अल्जाइमर्स, स्पाइनल इन्जुरी, हेड इन्जुरी र सिकलसेल एनिमियाका रोगको उपचारका लागि सहुलितय प्रदान गर्ने उल्लेख छ । मन्त्रालयका प्रवक्ता डा. बुढाथोकीका अनुसार कोशीका १५, मधेसका नौ, बागमतीका ६०, गण्डकीका १५, लुम्बिनीका १६, कर्णालीका दुई र सुदूरपश्चिम प्रदेशका तीन अस्पताल तोकिएका छन् ।
मुटु प्रत्यारोपणका लागि चार लाख रुपैयाँ, औषधिका लागि एक लाख र मुटुसम्बन्धी अन्य रोगका लागि एक लाख दिने कार्यविधिमा उल्लेख छ । यस्तै कुनै पनि क्यान्सर, पार्किन्सन्स, अल्जाइमर, स्पाइनल इन्जुरी, हेड इन्जुरी, सिकलसेल एनिमियालगायतका रोगका लागि उपचार खर्च एक लाख उपलब्ध गराउने मन्त्रालयले बताएको छ ।
