काभ्रे,
काभ्रे जिल्लाको पाँचखाल नगरपालिकामा–४ मा यात्रुबहाक बसको ठक्करबाट एक जनाको मृत्यु भएको छ । बसको ठक्करबाट गम्भिर घाइते बनेका सोही ठाउँका ६५ वर्षीय तीनधारे माइला भनिने दिलबहादुर श्रेष्ठको उपचारको क्रममा मृत्यु भएको पाँचखाल नगरप्रमुख महेश खरेलले जानकारी दिनुभयो । गम्भीर घाइते भएका श्रेष्ठलाई उपचारको लागि धुलिखेल अस्पताल लगिएकामा उपचारको क्रममा उनको मृत्यु भएको हो ।
दुई वटा बस यात्रु चढाउनका तँछाडमछाड गर्दै आईरहेको समयमा बा २ ख ६५७९ नम्बरको बस अन्यन्त्रित भई श्रेष्ठलाई ठक्कर दिएको बताईएको छ । श्रेष्ठको मृत्यु भएपछि आफन्त र स्थानीयले अरनिको राजमार्ग अवरुद्ध गरेका छन् । सडक अवरुद्ध भएपछि सो क्षेत्रको आवागमन प्रभावित भएको छ । स्थानीयले मृतकको परिवारलाई क्षतिपूर्ति उपलब्ध गराउनुपर्ने माग गरेका छन । पाँचखाल नगरप्रमुख खरेलले पीडितलाई क्षतिपूर्ति उपलब्ध गराउने र राजमार्ग खुलाउने विषयमा प्रयास भइरहेको जानकारी दिनुभयो । स्थानीयसँगको समन्वयमा राजमार्ग सुचारु गराउन पहल भइरहेको प्रहरीले जनाएको छ ।
