काभ्रे,
मौसम पूर्वानुमान महाशाखाले अबको तीन दिन देशका विभिन्न ठाउँमा फाट्टफुट्ट पानी पर्ने सम्भावना रहेको जनाएको छ । महाशाखाका वरिष्ठ मौसमविद् प्रतिभा मानन्धरका अनुसार यो क्रम पर्सि साँझसम्म नै चल्नेछ । पर्सि साँझबाट भने मौसम केही खुल्ने उहाँले बताउनुभयो ।
आज दिउँसो कोशी, मधेश, बागमती, गण्डकी र कर्णाली प्रदेशका थोरै तथा बाँकी पहाडी भू–भागका एक–दुई स्थानमा मेघगर्जन र चट्याङ्गसहित हल्का पानी पर्ने सम्भावना रहेको मौसम पूर्वानुमान महाशाखाले जनाएको छ ।अहिले कोशी प्रदेशका तराई क्षेत्रमा फाटफुट पानी परिरहेको उहाँको भनाइ छ । आज काठमाडौँमा पनि पानी पर्ने सम्भावना रहेको मौसमविद् मानन्धरले जानकारी दिनुभयो । दैनिक जनजीवन, कृषि, स्वास्थ्य, सडक तथा हवाई यातायातमा आंशिक प्रभाव पर्न सक्ने हुँदा त्यसबाट हुन सक्ने असरबाट बच्न आवश्यक सतर्कता अपनाउन महाशाखाले अनुरोध गरेको छ।
