काभ्रे,
काठमाडौंको विभिन्न ठाउँमा मोबाइल चोरी गर्ने काभ्रे जिल्लाका दुई जना सहित ७ जना पाकेटमारलाई प्रहरीले पक्राउ गरेको छ । पक्राउ पर्नेहरूमा काभ्रे जिल्लाको बेथानचोक गाउँपालिका वडा नम्बर ५ का ३५ वर्षीय प्रमोद परियार र खानिखोला गाउँपालिका वडा नम्बर ५ का २६ वर्षीय गुनराज न्यौपाने सहित बिभिन्न जिल्लाका गरी ७ जना रहेका छन् । उनीहरुबाट विभिन्न ब्राण्डका २७१ थान मोबाइल, १५ थान ल्यापटप र ९ थान ट्याब बरामद गरिएको प्रहरीले जनाएको छ । बरामद मोबाइलमध्ये १८ थान आइफोन रहेका छन् । उनीहरूलाई जिल्ला प्रहरी परिसर काठमाडौंको टोलीले पक्राउ गरेका हो ।
पाकेटमारीमा संलग्नलाई पक्राउ गरेर अनुसन्धान गर्दा ठूलो मात्रामा मोबाइल र ल्यापटप बरामद भएको हो । चोरीका मोबाइल यो समूहले भक्तपुरको जगातीस्थित सरोज मोबाइल रिपेयरिङ सेन्टेरमा बेच्ने गरेको पाइएको छ । यस बिषयमा थप अनुसन्धान भईरहेको छ ।
