काभ्रे,
भोलिदेखी रोशी गाउँपालिकामा प्रथम राष्ट्रिय रोशी कप फुल कन्ट्याक्ट कराँते प्रतियोगिता( २०८२ हुने भएको छ । “स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ विश्व स्वतन्त्र क्योकुशिन संघ नेपाल (डब्लुआइकेओ) को आयोजना र रोशी गाउँपालिकाको सहयोगमा प्रतियोगिता हुन लागेको हो । प्रतियोगिता रोशी गाउँपालिका–७ कटुञ्जेबेशी स्थित श्री रोशी माध्यमिक विद्यालय प्राङ्गणमा हुने छ ।
प्रतियोगिता मंसिर ५ र ६ गते गरी दुई दिन सञ्चालन हुने छ । भोलि मंसिर ५ गते बिहान ११ बजे देखी साँझ ५ बजेसम्म र पर्सि ६ गते बिहान ८ बजेदेखि शुरु भई दिउँसो २ बजे सम्पन्न हुने आयोजक संस्थाका प्रमुख तथा खेल प्रशिक्षक दिल दोर्जे लामाले जानकारी दिनुभयो । प्रतियोगिता फाइट र काता गरी दुई विधामा प्रतिस्पर्धा गराइने उहाँले बताउनुभयो ।
प्रतियोगिताका लागि काठमाडौं, मकवानपुर, काभ्रेको रोशी र तेमाल क्षेत्रका साथै नेपालमा प्रशिक्षणरत भारतीय खेलाडीहरू समेत गरी हालसम्म १५० जना खेलाडीको फर्म प्राप्त भइसकेको आयोजक संस्थाका प्रमुख लामाले बताउनुभयो ।
खेलाडीहरुकोे स्वास्थ्य सुरक्षा प्राथमिकतामा राखेर व्यवस्थित रुपमा प्रतियोगिता सञ्चालन गर्न लागेको बताउनुहुदै उहाँले प्रतियोगितालाई व्यवस्थित र सुरक्षित बनाउन सुरक्षा निकायसँग समन्वय, मेडिकल टिम र एम्बुलेन्स तयारी अवस्थामा राखिएको जानकारी दिनुभयो ।
