काभ्रे,
सत्ता गठबन्धन चार दलबिच राष्ट्रिय सभा निर्वाचनका लागि सिट बाँडफाँड भएको छ । प्रधानमन्त्री निवास बालुवाटारमा गएराति १२ बजेसम्म बसेको गठबन्धन सम्बद्ध नेपाली काँग्रेस, माओवादी केन्द्र, एकीकृत समाजवादी र जनता समाजवादी पार्टीबिच भएको छलफलले सिट बाँडफाँट करिब टुङ्गिएको काँग्रेस नेता रमेश लेखकले बताउनुभयो । माघ ११ मा निर्वाचन हुने १९ सिटमध्ये काँग्रेसले १०, माओवादी केन्द्रले ६, एकीकृत समाजवादीले २ र जसपाले एक सिट लिने भएका हुन् ।
बैठकमा काँग्रेसले ११, माओवादीले ७, एकीकृत समाजवादी र जसपाले ३÷३, जनमत, लोसपा, नागरिक उन्मुक्तिले १÷१ सिट दाबी गरेका थिए । यद्यपि एकीकृत समाजवादी र जसपाले थप एक–एक सिटको दाबी छाडेका छैनन् । काँग्रेस र माओवादीले एक–एक सिट छाड्नुपर्ने एकीकृत समाजवादी र जसपाको अडान छ । मतभारलाई हिसाब गर्दै काँग्रेस र माओवादीले एकीकृत समाजवादी र जसपालाई थप सिट दिने अवस्था नरहेको बताइसकेका छन् ।
