काभ्रे,
देशका अधिकांश क्षेत्रमा हिउँदे वर्षा भएसँगै गहुँबालीमा सिन्दूरे रोग लाग्ने सम्भावना रहेकाले सचेत रहन किसानलाई अनुरोध गरिएको छ । नेपालको पश्चिमी तराई र पहाडका जिल्लाहरूमा करिब ७ लाख हेक्टरभन्दा बढी क्षेत्रफलमा गहुँ खेती हुँदै आएको छ । सिन्दूरे रोग ढूँसीजन्य रोग भएकाले पानी परेपछि यसको जीवाणुको सङ्क्रमण बढी हुने जोखिम हुन्छ । देशको तराई क्षेत्रमा लगाइएको गहुँ बालीमा कालो र खेरौ सिन्दूरे अनि पहाडी क्षेत्रमा पहेँलो सिन्दूरे रोग लाग्ने गरेको छ ।
प्लान्ट क्वारेन्टाइन तथा विषादी व्यवस्थापन केन्द्रका बरिष्ठ बाली संरक्षण अधिकृत प्रकाश पौडेलले गहुँ बालीको नियमित अनुगमन गर्न र रोग देखा परे उचित मात्रामा विषादीको प्रयोग गर्न अनुरोध गर्नुभयो । यस्ता रोगबाट छुटकारा पाउन सरकारले सिफारिस गरेको जातका गहुँ बाली लगाउन पौडेलको अनुरोध छ । नेपालमा हाल बर्सेनि करिब २१ लाख मेट्रिक टनभन्दा बढी गहुँ उत्पादन हुने गरेको भए पनि आवश्यकता २५ लाख टन हाराहारीको छ । चालु आर्थिक वर्षको चार महिनामा मात्रै ९८ करोड ६७ लाख रुपैयाँ बराबरको २० हजार २ सय ७९ मेट्रिक टनको गहुँजन्य वस्तु आयात गरिएको भन्सार विभागले जनाएको छ ।
