काभ्रे,रेडियो रोशी,
काभे जिल्लाको रोशी गाउँपालिका वडा नं १२ ले ज्येष्ठ नागरिकलाई धार्मिक तीर्थ स्थलको भ्रमण गराएको छ । वडा कार्यालयले गत फागुन २८ देखी ३० गते तीन दिन सम्म वडाभित्रका ३० जना ज्येष्ठ नागरिकलाई सोलुखुम्बु स्थित जुनबेसी भन्ने ठाउँमा रहेको थुप्चेन च्छ्योईलिङ गुम्बा र हलेसी मन्दिरको भ्रमण गराईएको वडा अध्यक्ष बसन्त कुमार तामाङले जानकारी दिनुभयो । भ्रमणमा वडाभित्रका ३० जना ज्येष्ठ नागरिक, वडाका ३ जना वडा सदस्य र २ जना स्वास्थ्यकर्मी गरी ३५ जनाको सहभागिता रहेको थियो । सोलुखुम्बुको विभिन्न स्थानमा रहेका धार्मिक, पर्यटकिय एवं सांस्कृतिक स्थलहरुको समेत भ्रमण गराएको वडाअध्यक्ष तामाङले बताउनुभयो । भ्रमणका लागि वडा कार्यालयले २ लाख बजेटको ब्यवस्थापन गरेको थियोे ।
नयाँ ठाउँ घुम्न र गुम्बाकोे दर्शन गर्न पाउँदा भ्रमणमा सहभागी ज्येष्ठ नागरिकहरुले वडाअध्यक्ष तामाङ प्रति आभार प्रकट गरेका छन् । यसअघि वडाले यस्ता धार्मिक भ्रमण नगरेको र ज्येष्ठ नागरिकहरुको इच्छा चाहनाको उच्च सम्मान गर्दै यो भ्रमण आयोजना गरीएको तामाङले जानकारी दिनुभयो । धार्मिक तीर्थ स्थलको समापन भने दुम्जामा रहेको कुशेश्वर महादेव मन्दिरमा पुगेर समापन भएको थियो । तीर्थ यात्रा गरेर फर्किएका ज्येष्ठ नागरिकको टोलीलाई वडा अध्यक्ष तामाङले खादा लगाएर स्वागत गर्नुभएको थियो । वडाले अब हरेक वर्ष ज्येष्ठ नागरिककको सम्मान स्वरुप धार्मिक स्थलहरुको भ्रमण एवं अवलोकन गराउने वडा अध्यक्ष तामाङले बताउनुभयो ।
