काभ्रे,
रोशी उद्योग वाणिज्य संघले रोशी–४ महादेवटारका आगलागी पीडितलाई सहयोग बितरण गरेको छ । हिजो (शनिबार) रोशी–४ महादेवटार, सानोपोटा पुगेर अग्नी पीडितलाई १ लाख ६० हजार बराबरको जस्तापाता र खाद्यान्न सामग्री बितरण गरेको संघका अध्यक्ष मनिस बलले जानकारी दिनुभयो । विभिन्न उद्योग व्यवसायीहरु, सहयोगी दाताहरुसँग सहयोग संकलन गरेर आगलागी पीडितलाई १५ बन्डल जस्तापाता लगायतका सामग्री हस्तान्तरण गरिएको अध्यक्ष बलले बताउनुभयो । उँहाले सहयोग अझै निरन्तर रहने पनि बताउनुभएको छ । राहत सामग्री हस्तान्तरण कार्यक्रममा अध्यक्ष मनिस बलसहित महासचिव विकास लामा, सचिव निर्जला थापा, पदाधिकारीहरू, कार्यसमिति सदस्य मन्जु लामालगायतको उपस्थिति रहेको थियो ।
गत मंगलबार रोशी ४ महादेवटार सामुदायिक जंगलको डढेलो सानोकोटा गाँउमा पस्दा १५ घर, १० वटा गोठ र ८ वटा चर्पी जलेर नष्ट भएका थिए । आगोलागीबाट प्रहरीको मुचुल्का अनुसार २ करोड भन्दा धेरैको आर्थिक क्षति भएको थियो ।
