काभ्रे,
सिन्धुपाल्चोकको बलेफी गाउँपालिका–८ ले एकल महिलाहरुको आयआर्जन बढाउन उन्नत जातका पाडी बितरण गरेको छ । पहिलो चरणमा आठ जना एकल महिलालाई अहिले एक लाख बराबरको उन्नत जातका पाडी सहयोग गरिएको छ । वडा भित्रका अरू एकल महिलाहरुलाई अर्को पटक पाडी वा चौपाया सहयोग गरीने वडा अध्यक्ष रमेशकुमार श्रेष्ठले जानकारी दिनुभयो । वडाका अति विपन्न एकल महिलाहरू जसको कुनै आम्दानीको स्रोत नभएकाले आर्थिक रूपमा उन्नति गर्न वडाले सहयोगको आधार तयार गरी सहयोग गरिएको अध्यक्ष श्रेष्ठले बताउनुभयो । पाडी सहयोगका कारण कृषिमा पनि मद्दत पुग्ने अध्यक्ष श्रेष्ठको भनाई छ ।
वडा कार्यालयले एकल महिला, महिला, दलित, जनजातिहरूका समस्या पहिचान गर्दै उनीहरूको जीवनयापनमा सहजता ल्याउने कार्यक्रममा वडा जुटिरहेको उहाँ बताउनु हुन्छ । साथै दलित समुदायको अवस्था बुझिरहेकोले उनीहरूका लागि पनि सीपमूलक, आर्यमूलक कार्यक्रम ल्याउन लागिएको उहाँको भनाई छ ।
