काभ्रे,
तेमाल गाउँपालिकाको सार्वजनिक जग्गामा रहेका संरचनाहरु ६ महिना भित्र हटाउने व्यवसायी र गाउँपालिका बिच सहमति भएकोे छ ।
हिजो नारायणस्थानका व्यवसायीहरुले गाउँपालिका अध्यक्ष चन्द्रबहादुर तामाङ समक्ष आफूहरुले प्रयोग गर्दै आएको घर टहरा हटाइ अर्को व्यवस्था गर्नका लागि थप समय अधिकतम ६ महिना आवश्यक पर्ने जनाउँदै ६ महिना म्याद थपको लागि लिखित अनुरोध गरेका थिए ।
अध्यक्ष तामाङले सार्वजनिक जग्गामा रहेका संरचनाहरु हटाउन ६ महिनाको समय थप गर्नुभएको छ ।
सार्वजनिक सम्पतिको संरक्षण गर्नु सरकारको दायित्व भित्र परेको बताउँदै बैकल्पिक योजना अनुसार नै सार्वजनिक स्थलहरुमा निर्माण भएको घर टहाराहरुको व्यवस्थापन गर्न लागिएको अध्यक्ष तामाङले बताउनुभयो ।
यस अघि गाउँपालिकाले ३५ दिने, १५ दिने र ७ दिने सूचना जारी गर्दै सडक वरिपरि सार्वजनिक जग्गा मिचेर निर्माण भएका संरचनाहरु हटाउन अनुरोध गरेको थियो ।
