माघ ५,
२०७७,काभ्रे/
काभ्रे जिल्लाको तेमाल गाउँपालिकाद्वारा आयोजित पालिका स्तरीय दोस्रो अध्यक्ष कप अन्तर वडाव्यापी फुटवल प्रतियोगिता यहि माघ २५ बाट सुरु हुने भएको छ । ‘स्वास्थ्यका लागि खेलकुद राष्ट्रका लागि खेलकुद’ भन्ने मूल नाराका साथ आगामी माघ २५, २६ र २७ गते प्रतियोगिता हुन लागेको तेमाल खेलकुद विकास समितिका संयोजक तथा गाउँपालिका उपाध्यक्ष दुर्गामाया तामाङले जानकारी दिईन् ।
समितिले एक सुचना जारी गर्दै सम्बन्धित वडाको सिफारिस सहित प्रति वडा एक समूह गठन गरी टिम दर्ता गर्न अनुरोध गरेको छ । प्रतियोगितामा प्रथम परस्कार रु. २ लाख, दोस्रा पुरस्कार रु. १ लाख ५० हजार, तेस्रो पुरस्कारः रु. १ लाख, सान्त्वना पुरस्कार रु ५० हजार, बेस्ट किपरः रु. ५ हजार, बढी गोल गर्ने खेलाडीः रु. ५ हजार, उत्कृष्ट खेलाडी रु. ५ हजार राखिएको छ । खेल तेमाल गाउँपालिकाको प्रस्तावित रंगशाला, तेमाल–७, चापाखोरीमा हुने उपाध्यक्ष तामाङले जानकारी दिइन् ।
उनका अनुसार तेमाल गाउँपालिकाको आर्थिक वर्ष २०७७/०७८ को स्वीकृत वार्षिक कार्यक्रम अन्तर्गत प्रतियोगिता हुन लागेको हो । प्रतियोगितामा तेमाल गाउँपालिका भित्र रहेका स्थानीय फुटवल टिमका खेलाडीहरुलाई समावेश गराउने उपाध्यक्ष तामाङले बताइन् । स्थानीय खेलाडीहरुको उत्कृष्ट खेल प्रदर्शनको मुल्यांकन, दक्ष र अनुभव बटुल्ने गरी खेलाडीहरुको मानसिक, शारीरिक अन्तुरुस्तीका साथ उच्च मनोबल राख्नका निम्ति कार्यक्रम सञ्चालन गर्न लागेको उनको भनाई छ । गत वर्षको प्रतियोगिता भन्दा यस वर्षको खेल व्यवस्थित र मर्यादित हुने उनको दावी छ ।
