काभ्रे,
रोशी गाउँपालिका वडा न १२ का दलित समुदायलाई बाख्रा, महिलाहरूका लागि ट्याक्टर र बिषादी छर्ने मेसिन प्रदान गरीएको छ । रोशी गाउँपालिकाले दलित समुदायको जीवनस्तर उकास्नका लागि भन्दै दलित उत्थान कार्यक्रम अन्तर्गत बाख्रा, महिलाहरूका लागि ट्याक्टर र बिषादी छर्ने मेसिन वितरण गरेको हो । हिजो (बुधबार) गाउँपालिका अध्यक्ष दिनेश लामाको प्रमुख आतिथ्यतामा बाख्रा, ट्याक्टर र स्प्रे मेसिन वितरण गरिएको हो । वडा न १२ का १७ घरधुरी दलित समुदायको लागि प्रतिघर २ वटाका दरले ३४ वटा बाख्रा र दुइवटा समुहको लागि २ वटा बोकासहित ३६ वटा बोका बाख्रा वितरण गरिएको हो ।
बोका, बाख्रा वितरण गर्दै अध्यक्ष लामाले पिछडिएको दलित समुदायको उत्थानका लागि आर्थिक उपार्जन होस भन्ने हेतुले बाख्रा वितरण गरिएको बताउनुभयो । ‘पिछडिएको समुदायको उत्थान गर्नु सरकारको दायित्व हो’ –अध्यक्ष लामाले भन्नुभयो । पिछडिएका समुदायको उत्थानका लागि पहिले आर्थिक रुपमा मजबुत गर्नेपर्ने बताउदै उँहाले आर्थिक उपार्जन होस भनेर नै यी सामग्रीहरु बितरण गरिएको बताउनुभयो ।
गाउँपालिका उपाध्यक्ष मिमबहादुर वाइबाले रोशी गाउँपालिका बिकास निर्माणको काममा बिस्तारै अगाडि बढिरहेको बताउनुभयो । त्यसैगरी गाउँपालिकाका प्रवक्ता तथा वडा न १२ का वडाध्यक्ष वसन्तकुमार स्याङ्तानले वडा न १२ का अधिकाङ्स पुरुषहरु रोजगारीका लागि बिदेशीएका कारण घरमा भएका महिलाहरूलाई कृषिका लागि सहज होस भन्ने हेतुले ट्याक्टर र बिषादी छर्ने मेसिन वितरण गरेको बताउनुभयो । त्यसैगरी वडा न ११ का वडाध्यक्ष लालकुमार पाख्रीनले वडा न ११ का स्थानीयहरुले पनि बाख्रा वितरणबाट राम्रै आम्दानी गर्न थालेको बताउनुभयो ।
