काभ्रे,
नमोबुद्ध नगरपालिकाले नगर भित्रका जेष्ठ नागरिकको निःशुल्क स्वास्थ्य परिक्षण गरेको छ । नगरपालिकाले ७० बर्ष माथिका जेष्ठ नागरिकको टोल टोलमै गएर निःशुल्क स्वास्थ्य परिक्षण तथा परामर्श दिएको हो । नगर भित्रका बिभिन्न ६३ वटा टोलमा स्वास्थ्यकर्मी, महिला सामुदायिक स्वास्थ्य स्वयंसेविका लगायतको सहयोगमा जेष्ठ नागरिकको निःशुल्क स्वास्थ्य परिक्षण गरिएको हो ।
यसरि ११ वटै वडाहरुबाट गरेर ६ हजार ६५ जना जेष्ठ नागरिकलाई सेवा दिएको स्वास्थ्य शाखा प्रमुख सुनिल के.सी.ले जानकारी दिनुभयो । साथै ७ सय ५२ जनालाई निःशुल्क औषधी वितरण गरिएको छ । आफुले गरेको पूर्व प्रतिवद्धता अनुसार ‘जेष्ठ नागरिक स्वास्थ्य सेवा कार्यक्रम’ सञ्चालन गरेर जेष्ठ नागरिकलाई घरदेलौ र पायक पर्ने स्थानमा सेवा दिएको नगर प्रमुख कुनसाङ लामाले बताउनुभयो । आफू निर्वाचित भएपछि गरेका प्रतिवद्धता क्रमशः पुरा गर्दै लगेको नगर प्रमुख लामाले बताउनुभयो । नगरपालिकाले यसअघि नसर्ने रोगको प्रकोप देखिएको भन्दै १८ बर्ष माथिका सम्पूर्ण नगरवासीको निःशुल्क स्वास्थ्य परिक्षण तथा एक बर्षसम्म औषधी समेत निःशुल्क उपलव्ध गराएको थियो ।
