माघ ९,
२०७७,काभ्रे/
काभ्रे जिल्लालाई सहयोगापेक्षी सडक मानव मुक्त बनाइने भएको छ । बेसहारा, अशक्त, असहाय, अनाथ, अभिभावकविहीन सडकमा आश्रित मानवलाई उद्धार गरेर काभ्रेलाई सहयोगापेक्षी सडक मानव मुक्त बनाउने अभियान सुरु भएको छ । नेपाललाई सहयोगपेक्षी सडक मानव मुक्त बनाउन मेची महाकाली अभियान लिएर हिडेका अभियान्ताले काभ्रेलाई पनि सहयोगापेक्षी मुक्त बनाउनुपर्ने बताएका हुन । पुस ७ गतेबाट मेची–महाकाली यात्रा सुरु गरेको उक्त टोली आज (शुक्रबार) बनेपा आइपुगेको हो ।
मानवसेवा आश्रमद्धारा सञ्चालन गरिएको मेची महाकाली यात्रामा रहेका उनीहरुलाई स्वागत गर्दै जिल्ला समन्वय समिति काभ्रेका प्रमुख उद्धव केसीले काभ्रे जिल्लालाई सहयोगापेक्षी सडक मानव मुक्त बनाइन प्रतिवद्ध रहेको बताए । उनले जिल्लाका १३ वटै स्थानीय तहमा यो अभियान सञ्चालन गर्ने र छिटै काभ्रेलाई सहयोगापेक्षी सडक मानव मुक्त बनाइने छौँ, भने ।
माघ १६ गते सम्म चल्ने मेची महाकाली यात्रा ४० जिल्लामा पुगिसकेको छ । यात्राका क्रममा ६ सय जनाको उद्धार गरिएको मानवसेवा आश्रमका अध्यक्ष रामजी अधिकारीले जानकारी दिए । मानवसेवा आश्रमद्धारा सञ्चालन गरिएको अभियानमा १५० जना स्वयमसेवकको सहभागिता रहेको छ । बनेपा नगरपालिका नगरप्रमुख लक्ष्मीनरसिंह बादे, धुलिखेल नगरपालिका उपप्रमुख विमला शर्मा चौँलागाई, खानीखोला गाउँपालिकाका अध्यक्ष कृष्णबहादुर खुलाल, रोशी गाउँपालिका उपाध्यक्ष लक्ष्मी बर्तौला, नेपाल पत्रकार महासंघ काभ्रे शाखाका अध्यक्ष मोतीराम तिमल्सिना लगायतले मन्तव्य राखेका थिए । टोलीले आज पनौती नगरपालिका, बनेपा नगरपालिका लगायत क्षेत्रबाट पाँच जनाको उद्धार गरेको थियो ।
