काभ्रे,
त्रिशूलीमा खसेर बेपत्ता दुई वटा डिलक्स बस र यात्रुको खोजीका लागि सरकारले भारत र बङ्गलादेशसँग सहयोग मागेको छ । दुबै देशबाट सकारात्मक प्रतिक्रिया आउने अपेक्षा गरेको गृहमन्त्रालय मातहतको विपद् प्रतिकार्य कमाण्ड पोष्टका प्रमुख डा भिस्मकुमार भुसालले बताउनुभयो । उहाँका अनुसार सिमलताल क्षेत्रको दुर्घटनास्थल, त्रिशुली नदीको पानीको बहाव र अवस्थाका बारेमा थप भिडिओ पठाउने तयारी पनि भइरहेको ।
भारतसँग सिधै कुराकानी गरेर सहयोग माग गरिएको र बङ्गलादेशसँग नेपालस्थिति दूतावासमार्फत कुराकानी गरिएको भुसालले जानकारी दिनुभयो । बङ्गलादेशसँग भएको उपकरण र जनशक्ति विगतका वर्षमा नेपालमा पनि प्रयोग गरिएको र त्यसबेलाको प्रभावकारिताका आधारमा थप कस्तो सहयोग लिने भन्ने बारेमा पनि सरकारले छलफल चलाएको छ ।
यसैबिच,
सिमलताल दुर्घटनामा परेर फेला परेका थप २ वटा शवको परिचय खुलेको छ । जिल्ला प्रहरी कार्यालय चितवनका प्रवक्ता, डीएसपी भेषराज रिजालका अनुसार चितवनको भरतपुर पदमपोखरी बस्ने २२ वर्षका सुदीप विक र रौतहट जमुनामाइ गाउँपालिका ४ का १७ वर्षका रहुप मियाको शव पहिचान भएको हो । सिमलताल दुर्घटनामा परेकामध्ये हालसम्म ८ जनाको शव आफूहरूलाई प्राप्त भएको र ७ जनाको परिचय खुलेको डीएसपी रिजालले जानकारी दिनुभयो ।
गएको शुक्रवार बिहान सिमलतालबाट दुईवटा बस त्रिशुली नदीमा खसेर बेपत्ता भएका थिए । बसमा कम्तिमा ६५ यात्रु रहेको अनुमान गरिएको छ । सुरक्षाकर्मीले निरन्तर खोजी गरेको भए पनि हालसम्म बस भेटिएका छन् । बसमा सवार यात्रुको शव भने दिनहुँ भेटिन थालेका छन् ।
