काभ्रे,
असार अन्तिमसम्म बागमती प्रदेशमा ७० प्रतिशतभन्दा बढी क्षेत्रफलमा धान रोपाइँ भएको छ । कृषि तथा पशुपन्छी विकास मन्त्रालयले दिएको जानकारी अनुसार असार ३० गते आइतबारसम्म प्रदेशका १३ जिल्लामा ७० दशमलव ५९ प्रतिशत रोपाइँ सकिएको हो ।
प्रदेशको १३ जिल्लामा कूल १ लाख १४ हजार पाँच सय ६१ हेक्टर जमिनमा धान खेती हुने गरेकोमा हिजो असार ३० गते आइतबार सम्म जम्मा ७९ हजार २५७ हेक्टर क्षेत्रफल अर्थात् ७०.५९ प्रतिशत रोपाइँ सम्पन्न भएको छ । तथ्याङ्क अनुसार काभ्रे जिल्लामा १० हजार १०८ हेक्टर जमिनमध्ये ७४ प्रतिशत अर्थात् ७ हजार ४३३ हेक्टर जमिनमा धान रोपाइँ भएको छ ।
प्रदेशका १३ जिल्लामा सबैभन्दा बढी दोलखामा ८८ प्रतिशत रोपाइँ सकिएको कृषि तथा पशुपन्छी विकास मन्त्रालय बागमती प्रदेशका सूचना अधिकारी अनुप अधिकारीले जानकारी दिनुभयो । दोलखामा धान रोपाइँ हुने कुल क्षेत्रफल दुई हजार ८१४ हेक्टर रहेकोमा अहिलेसम्म दुई हजार ४७६ हेक्टर क्षेत्रफलमा रोपाई भएको छ । यस्तै सबैभन्दा कम रोपाइँ धादिङमा जम्मा ५३ प्रतिशत मात्रै भएको छ । यहाँ ११ हजार ३०० हेक्टर जमिनमध्ये ६ हजार ४६ हेक्टर अर्थात् ५३ प्रतिशत जमिनमा धान रोपाइँ सकिएको हो ।
