काभ्रे,
साहित्यकार एवम् निजामति कर्मचारी तारादेवी सुनुवारको अनुभूतिसङ्ग्रह ‘युद्धभूमिमा डामिएको मन’ लोकार्पण भएको छ । हिजो (शनिवार) नेपाल प्रज्ञा प्रतिष्ठान कमलादी काठमाडौँमा एक कार्यक्रमको आयोजना गरेर पुस्तकको साहित्यकार डा. नवराज लम्साल, प्रतीक ढकाल, कवि मोमिला जोशी, कथाकार डा. अशोक थापा र लेखक तारादेवी सुनुवारले संयुक्त रुपमा लोकार्पण गरेका हुन् । अनुभूतिहरूको सङ्ग्रह ‘युद्धभूमिमा डामिएको मन’ जागिरे जीवनको क्रममा रोल्पा बस्दाको अनुभूति समेटेर तयार पारिएको कृति हो । रोल्पाली दिदिबहिनीहरूसँगको बसाई र उनीहरुले भोगेको पीडा र त्यहाँको वास्तविकता कृतिमा उतारेको लेखक तारादेवीले बताउनुभयो । पुस्तकमा ग्रामीण जीवनको सुन्दरता, द्वन्दकालीन परिवेश, पारिवारिक विरासत र दैनिक अनुभवहरु समेटिएको उहाँले भन्नुभयो ।
साहित्यकार डा. लम्सालले लेखक तारादेवी सुनुवारको लेखन शैलीको प्रशंसा गर्नुभएको छ । तत्कालीन शसस्त्र युद्धको विषयवस्तु भएपनि बीचमा बसेर लेख्न सकेको भन्दै उहाँले लेखाइमा कुनै कुण्ठा, आवेग, दुराशय, चिन्ता नरहेको बताउनुभयो । जीवन्त रहेको उहाँको यो पुस्तक रोल्पा चिन्न चाहने सबैले पढ्नैपर्ने बताउनुभयो । पुस्तकमा ग्रामीण जीवनको सुन्दरता, द्वन्द्वकालीन परिवेश, पारिवारिक विरासत र दैनिक अनुभवहरू समेटिएको छ । नेपाली र सुनुवार भाषमा कलम चलाउनुहुने उहाँ मुलतः कवि हुनुुहुन्छ ।
नेपाली र सुनुवार भाषामा बराबर कलम चलाउने ताराका नेपाली भाषामा ‘परिस्थिति’, ‘अविरल’ तथा गजलसङ्ग्रह ‘सम्झनाका फूलहरू’ प्रकाशित छन् । यस्तै, सुनुवार भाषामा ‘थुँ थ्यानी संग्रह’, ‘देष् मपथु वोय’, कवितासंग्रह ‘सुया’ र गजलसंग्रह ‘झुल्पी फू’ प्रकाशित छन् ।
