काभ्रे,
आर्थिक बर्ष २०८०÷०८१ मा रोशी गाउँपालिका र वडा कार्यालय मार्फत सम्पादित क्रियाकलापहरूको समीक्षा गरिएको हो । गाउँपालिका अध्यक्ष दिनेश लामाको अध्यक्षतामा आज (शुक्रबार) गाउँपालिकाको बार्षिक प्रगति समीक्षा कार्यक्रम सम्पन्न भएको हो ।
गाउँपालिकाले आर्थिक बर्ष २०८०÷०८१ मा विनियोजित रकमको ८० दशमलव ८५ प्रतिशत आर्थिक प्रगती हासिल गरेको छ भने आन्तरिक राजश्व संकलन लक्ष भन्दा बढी संकलन भएको छ । एक करोड २३ लाख ९० हजारको लक्ष राखेकोमा १ करोड ३५ लाख ४४ हजार ५ रुपैया राजश्व संकलन भएकोे प्रमुख प्रशासकीय अधिकृत रामबहादुर तामाङले जानकारी दिनुभयो ।
कार्यक्रमलाई सम्बोधन गर्नुहँुदै अध्यक्ष लामाले समृद्ध रोशी निर्माणका लागि सबै पक्ष एकजुट भएर लाग्न अनुरोध गर्नुभयो । ‘समृद्ध रोशी निर्माणमा गाउँपालिकाले मात्र केही गरौँ भनेर हुदैँन । यसमा जनप्रतिनिधि, कर्मचारी, पत्रकार, समाजसेवी सबै एक भएर लाग्यौँ भने समृद्ध रोशी निर्माण गर्न सक्छौँ ।’– अध्यक्ष लामाले भन्नुभयो । रोशीको स्रोत र साधनले भ्याएसम्म विकास निर्माणमा लागि परेको उहाँको भनाई छ ।
त्यसैगरी गाउँपालिकाका उपाध्यक्ष मिमबहादुर वाईबाले संघ र प्रदेश सरकारले सिलिङ अनुसार वित्तिय हस्तान्तरण नगरेकाले सोचे अनुसारको प्रगति हाशिल गर्न नसकेको बताउनुभयो । संघ र प्रदेश सरकारले विनियोजित रकम उपलब्ध गराएको भए सतप्रति प्रगति हासिल गर्न सक्ने उपाध्यक्ष वाईबाको भनाई छ ।
कार्यक्रममा गाउँपालिकाका प्रमुख प्रशासकीय अधिकृत रामबहादुर तामाङले दुरदृष्टिको योजनाहरू बनाएर अगाडी बढ्नुपर्ने बताउनुभयो । कार्यक्रममा प्रमुख प्रशासकीय अधिकृत रामबहादुर तामाङले पालिकाको प्रगति विवरण, बिभिन्न शाखा प्रमुखहरूले बिषयगत शाखाको प्रगति विवरण र १२ वटै वडाका वडासचिवहरूले वडाको प्रगति विवरण प्रस्तुत गरेका थिए । समीक्षा कार्यक्रममा वडाअध्यक्षहरु, पालिकाका कर्मचारीहरु लगायतको सहभागिता रहेको थियो ।
