काभ्रे,
काभ्रे जिल्लाको रोशी गाउँपालिकामा लम्पी स्किन रोग बिरुद्धको खोप अभियान जारी छ । पशु सेवा कार्यालय काभ्रेको आयोजना तथा रोशी गाउँपालिकाको समन्वयमा यहि साउन २५ गतेदेखि खोप अभियान संचालन भएको हो । ‘लम्पी स्किन रोग खोप लगाऔ, पशुधन जोगाऔ’ भन्ने नाराका साथ लम्पी स्किन रोग नियन्त्रण तथा रोकथामका लागि सप्ताहव्यापी खोप अभियान संचालन भएको हो ।
आजसम्ममा ३ सय ६० गाई,भैसीलाई लम्पी स्किन रोग बिरुद्धको खोप लगाइएको रोशी गाउँपालिका पशु सेवा शाखाका प्रमुख शोभा गुरुङले जानकारी दिनुभयो । खोप अभियान ३१ गतेसम्म संचालन हुने छ ।
गाउँपालिका अध्यक्ष दिनेश लामाले पहिलो चरणमा पशु सेवा कार्यालयले लम्पी स्किन रोग बिरुद्धको खोप लगाएको बताए । किसानको माग भएमा गाउँपालिकाले भ्याक्सिन खरिद गरि लगाउने लामाको भनाइ छ ।
गर्मी याममा लामखुट्टे, झिँगा लगायतका कारण यो रोगको प्रकोप देखिने गर्दछ । गाईभैँसीमा यो रोग देखापरेमा उच्च ज्वरो आउने, दानापानी कम खाने, दूध उत्पादन घटाउने, छालामा एकदेखि पाँच सेन्टिमिटरको साह्रो गोलो गिर्खा देखिने, ¥याल काढ्ने र लिम्फनोड सुक्नेजस्ता लक्षणहरु देखा पर्दछन् ।
यो रोग लाग्न नदिनका लागि लम्पी स्किन रोग बिरुद्धको खोप लगाउने, विश्वसनीय स्रोतबाट गाईभैँसी खरिद गर्ने, गोठलाई झिँगा, लामखुट्टे तथा अन्य कीराबाट मुक्त राख्ने, सरसफाइमा ध्यान दिने र आवश्यकतानुसार कीट विकर्षकको प्रयोग गर्न पशु प्राविधिकले सुझाव दिएका छन् ।
