काभ्रे,रेडियो रोशी,
६०औं राष्ट्रिय बालदिवसको अवसरमा काभ्रे जिल्लाको नमोबुद्द नगरपालिकाले १९ बिद्यालय सम्मिलित अन्तर प्राथमिक तह हाजिरिजवाफ प्रतियोगिता सम्पन्न गरेको छ । आज नमोबुद्द नगरपालिकाको आयोजना तथा जनक मा.वि को सहजीकरणमा जनक मा.वि को सभाहलमा प्रतियोगिता आयोजना गरिएको हो । नगर प्रमुख कुन्साङ लामाको प्रमुख आतिथ्यता तथा प्रमुख प्रशासकीय अधिकृत शेषकान्त पौडेलको अध्यक्षतामा प्रतियोगिता सञ्चालन भएको हो ।
प्रतियोगितामा नगरपालिका भित्रका विभिन्न १९ बिद्यालयका बिद्यार्थीहरु सहभागी भएका थिए । प्रतियोगितामा सहभागी ४ र ५ कक्षाका बिद्यार्थीहरुलाई पाठ्यक्रममा आधारित प्रश्नहरु सोधिएको थियो । प्रत्येक बिद्यालयबाट ३ जना बिद्यार्थी र एकजना प्रतिनिधि शिक्षक सहभागी भएका थिए । सहभागी १९ वटा बिद्यालय मध्येबाट दुई चरणमा प्रतियोगिता सञ्चालन गरेर ६ वटा बिद्यालय अन्तिम चरणमा प्रवेश गरेका थिए ।
पहिलो चरणमा सहभागी १० वटा बिद्यालयबाट ४० नम्बर सहित श्री जनता प्रा.वि, समान अङ्क ३५ सहित श्री गणेश प्रा.वि र श्री मथुरापाटी मा.वि फाइनलमा प्रवेस गरेका थिए । त्यसैगरि विभिन्न ९ वटा बिद्यालयहरु सहभागी दोस्रो चरणमा समान ४०÷४० अंक सहित जनहित मा.वि, बाल उज्वल मा.वि र सरस्वती प्रा.वि अन्तिम चरणमा प्रवेश गरेका थिए ।
दुई चरणबाट फाईनलमा प्रवेस गरेका यी ६ वटा बिद्यालयहरु बिच भएको फाईनल प्रतियोगिताबाट ५० अंक प्राप्त गरेर नमोबुद्ध–२ मा रहेको श्री जनता प्रा.वि प्रथम भएको छ । त्यसैगरी ४५ अंक सहित नमोबुद्ध–१ मा रहेको श्री मथुरापाटी मा.वि दोस्रो, २५ अंक सहित नमोबुद्ध–७ मा रहेको श्री सरस्वती प्रा.वि तेस्रो बनेको थियो । २० अंक मात्र प्राप्त गरेको नमोबुद्ध–८ मा अवस्थित श्री गणेश प्रा.वि सान्त्वना अर्थात चौथो बनेको थियो ।
प्रतियोगिता प्रथम, दोस्रो, तेस्रो र सान्त्वना स्थान हासिल गरेका बिद्यालयका बिद्यार्थीहरुलाई नगरका प्रमुख प्रशासकीय अधिकृत शेषकान्त पौडेलले प्रमाणपत्र र कदर सहित क्रमशः ७००० (सात हजार), ५००० (पाँच हजार), ३००० (तीन हजार) र २,००० (दुई हजार) रुपैया पुरस्कार वितरण गर्नुभएको छ ।
कार्यक्रममा नगरका योजना अधिकृत बिष्णु कुमार अधिकारी, नगरका बिभिन्न शाखाका कर्मचारीहरु, जनक मा.वि का शिक्षकहरु, सहभागि १९ वटै बिद्यालयका शिक्षकहरु लगायतको उपस्थिति रहेको थियो ।
