काभ्रे,
पूर्व प्रधानमन्त्री एंव नेपाली कांग्रेसका सभापति शेरबहादुर देउवा असोज ५ गते काभ्रेको धुलिखेल आउनुहुने भएको छ । धुलिखेल नगरपालिका–६ स्थित धुलिखेल अस्पताल चोकमा निर्माण भएको जननायक वि.पी. कोइरालाको प्रतिमा अनावरण कार्यक्रमको उद्घाटन गर्न काभ्रे आउन लाग्नुभएको हो । २०७१ सालमा नेपाली कांग्रेसका तत्कालिन महामन्त्री कृष्णप्रसाद सिटौलाले शिलान्यास गर्नुभएको प्रतिमाको ९ बर्षपछि असोज ५ गते अनावरण गर्न लागिएको हो । ढलौटबाट बनेको प्रतिमाको लागत १५ लाख रुपैयाँ छ ।
प्रतिमा स्थापनाका लागि ‘महामानव बिपी कोइराला प्रतिमा निर्माण मूल समिति’ गठन गरी काम अघि बढाइएको नेपाली कांग्रेस काभ्रे जिल्ला सहसचिव समीर ब्यन्जू श्रेष्ठले जानकारी दिए। प्रतिमा स्थापनाका लागि धुलिखेल नगर सभापति विदुरबहादुर बस्नेत नेतृत्वले जिल्ला सदस्य जितकृष्ण श्रेष्ठको संयोजकत्वमा समिति गठन गरेका थिए ।
बिपीको परिकल्पनामा ०५२ सालमा बिपी राजमार्ग निर्माण सुरु भएको थियो। २०१५ सालमै बिपीले राष्ट्रिय राजमार्गको परिकल्पना गरेर धुलिखेलबाट पूर्व जोड्ने सडक बनेको थियो। उक्त राजमार्गले धुलिखेलपूर्वको जनजीवन परिवर्तनमा महत्त्वपूर्ण भूमिका खेलेको हुनाले सम्मानस्वरूप उहाँको प्रतिमा स्थापना गरीएको हो ।
