काभ्रे, रेडियो रोशी,
सामुदायिक विद्यालय व्यवस्थापन समिति महासंघ नेपालले तत्काल विद्यालय शिक्षा ऐन जारी हुने विश्वसनीय आधार सहितको कार्यतालिका ल्याउन सरकार र सम्बद्ध पक्षसँग माग गरेको छ । महासंघले आज एक विज्ञप्ति जारी गर्दै यस्तो माग गरेको हो ।
विज्ञप्ति मार्फत महासंघका अध्यक्ष गुणराज मुक्तानले आपसी संवाद मार्फत समस्याको निकास खोज्न र तत्काल शिक्षकहरुलाई सडकबाट विद्यालयमा फर्काउन नेपाल सरकार र आन्दोलनरत नेपाल शिक्षक महासंघलाई आग्रह गर्नुभएको छ ।
सडक आन्दोलन शुरु भएको एक महिना हुन लाग्दा समेत आन्दोलनरत पक्ष र सरकारको विचमा संवादको ठोस प्रक्रिया शुरु नभएको एवं शिक्षकको माग संवोधन गर्न पक्ष, सरकारको शिक्षा मन्त्रीले नै राजिनामा दिएपश्चात परिस्थिति थप जटिल बनेको अध्यक्ष मुक्तानको भनाई छ ।
शिक्षक आन्दोलन अन्तर्गतको शैक्षिक आम हड्तालबाट करिव २८ हजार सामुदायिक विद्यालयहरुका विद्यार्थीको परीक्षा सञ्चालन, नतिजा प्रकाशन र भर्ना प्रकृया अवरुद्ध रहेकोले लाखौं बालवालिकाको अधिकार र मनोविज्ञानमा परेको गम्भीर असर र अभिभावकहरुमा छाएको अन्यौलता प्रति महासंघ चिन्तित बनेको विज्ञप्तिमा उल्लेख गरिएको छ ।
सविधान जारी भएको एक दशक हुँदा पनि नआएको शिक्षा ऐनको माग गर्दै नागरिकको तर्फबाट नेपाल शिक्षक महासंघको नेतृत्वमा भएको सडक आन्दोलनलाई नजर अन्दाज नगर्न र गम्भीरता पुर्वक समस्या समाधानमा जिम्मेवार बन्न महासंघले नेपाल सरकार समक्ष माग गरेको छ । त्यसैगरि जिम्मेवारी पूर्वक गम्भीर ढंगले परिस्थितिको आँकलन गरेर आन्दोलनको स्वरुप परिवर्तन गर्न नेपाल शिक्षक महासंघलाई आग्रह गरेको छ ।
साथै महासंघले शिक्षकहरूको जायज मागलाई समर्थन गर्दै बालवालिकाको अधिकार, मनोविज्ञान र भविस्यलाई मध्यनजर गर्दै प्रधानाध्यापक, शिक्षक र विद्यालय कर्मचारीहरुसँग समन्वय गरेर अवरुद्ध रहेको परीक्षा सञ्चालन, नतिजा प्रकाशन र विद्यार्थी भर्नां कार्यलाई सहजिकरण गर्नु देशभरीका विद्यालय व्यवस्थापन समितिहरुलाई आव्हान समेत गरेको छ ।
